「伍家朗一記大力扣殺，千鈞一發間對手勉強救球，關鍵時刻家朗趁機於網前擊球，對手筋疲力盡，無力回天！」這個勝利夢，近月伍家朗已夢過不知多少遍，過去大半年體壇停擺，疫情反覆，奧運延期，未知的前景雖然磨人，「夢中」的伍家朗更開發了煮食新技能，但睡夢醒了，回歸「現實」，男單世界第八的他抖擻精神，繼續挑戰奧運夢。
記者/攝影：洪量丰
部份圖片由受訪者提供
遙望今年3月香港羽毛球隊戰罷全英賽即急急趕回港避疫，是這麼遠，又那麼近，轉眼又是年底，伍家朗依然記得當時的倉卒，「全英賽前去咗歐洲一個月，比賽前好興奮，等咗咁耐終於落場，之後情況就突然變晒，歐洲疫情開始爆發，但入場觀眾都冇戴口罩，我開始驚，比賽前提心吊膽，自己發揮都唔太理想，輸咗之後大家都想盡快返香港。」
3月風起雲湧，國際體壇大賽幾日間接連停擺，月尾甚至東京奧運也宣佈延期一年，運動員日夜苦追的目標也煙消雲散。世界大變，但伍家朗自言年輕，他樂觀指延期反而給予他進步機會，坦然面對變遷，「當時又隔離又封館，都唔知點先有正常訓練，如果又封又要打奧運，心理上未準備好，𠵱家突然多咗一年，相信身體狀況唔會走下坡，反而再多一年時間去進步。」
伍家朗回港後要居家隔離兩周，體壇訓練時停時啟，疫情來襲體院又閉門禁足，家朗坦言一時間苦悶難耐，「我以前每一日除咗練習都仲有其他活動，我又鍾意出街四圍逛，隔離時只可以留喺屋企，好似每日起身都冇嘢好做。」他說平日出外比賽心情緊張，最愛到處以吃紓壓，談起每年亞錦賽時隨大師兄胡贇於其家鄉湖北吃全羊宴的日子，他雙眼放光，疫情下足不出戶，悶極惟有發掘餘閒煮食興趣，「以前都想試，但時間唔多，疫情期間就有機會喇，當發展一門手藝，通常上網睇教學，有時打電話問嫲嫲，再自己嘗試，拿手我唔敢講，不過煮最多就係魚香茄子。」
說到底，運動員最看重和掛念的，還是那長方比賽場，過去半年只練不賽，家朗不諱言難免感到迷茫枯燥，日有所思，他指甚至做夢也夢見比賽場面，「其實唔太習慣，冇咗比賽，個人好似冇咗目標；外出比賽會有唔同對手，但訓練時就只有隊友，大家對對方套路非常了解，冇乜新鮮感。」奧運延期體壇「大執位」，一代經典林丹7月宣佈退役，伍家朗生涯四次擊敗林丹，名將黯然離開，家朗坦言可惜，「如果冇疫情，我諗佢一定會堅持到2020年奧運後，不過對年紀大嘅運動員嚟講，冇比賽打，目標就冇咁明確，日子會比較難捱，所以都可以理解。」問他如何形容2020年，他道是「平淡」，但2021年將至，他笑說終於要進入「作戰狀態」。
外國體壇常言「Trust the process」（相信過程），即使今年如何難過，終究是為明年鋪路，年中疫情最嚴峻時期，體院一度只得四名羽毛球運動員留守，伍家朗正是其中一人，在那他日夜苦練的場館內，牆上高掛一張印有「輕裝上陣，創造奇蹟」的橫額，其實所謂輕裝，不過是勤奮不懈的堅毅成果。
