【姐匙Talk】公主自私食要拍檔呆等

唱歌出身嘅「公主」近年撈得都唔錯，雖然市道麻麻，但一直都有戲拍，之前上嗰部戲反應亦好好，不過有唔少行內人就唱衰公主冇品。

話說公主之前同兩位男演員一齊宣傳新戲，通常做訪問都會安排喺一日之內完成，由朝排到晚，一間傳媒緊接一間咁做，時間好緊湊，只會中間攝少少時間食啲嘢，叫做填吓個肚就算，大家都明白所以會將就吓，而女演員需要時間化妝整頭，宣傳公司都會預留時間搞到妥當。

稱服裝問題匿入房

訪問期間，公主突然話自己條裙出問題，跟住就帶埋兩個助手入房，過咗半個鐘都未返出嚟，身邊助手亦冇出去同工作人員溝通，留低兩個拍檔同傳媒喺出面呆等。不過現場空間有限，外面嘅人都聽到房入面傳出嘅餐具聲同笑聲，雖然兩位男演員表面上冇任何不滿，不過大家都心知肚明，公主訛稱入房整衫，分明係入房醫肚，最後宣傳人員忍唔住拍門問得未，公主先施施然行出房，男演員就趁開房門一刻望入去，清楚見到房入面有架餐車，當然係一肚火，最嬲係公主覺得自己冇問題，冇表現出專業態度，可能自覺好紅就要大家配合。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。