【本報訊】去年200萬+1人遊行翌日出獄的黃之鋒，昨再次步入監房，出獄至今一年半，他已面對三宗案件、六項控罪。他昨就出獄後四日、即6月21日，煽動群眾包圍灣仔警總一案認罪，預料刑期不會短，他今次入獄，令國際戰線又少了重要一員。黃入獄前接受本報專訪，坦言已有心理準備再身陷囹圄，「只寄望經歷的苦難不會教自己完全洩氣，能夠分擔香港人這族群要承擔的苦難，自覺與有榮焉」。他認為，從來香港人的團結都並非取決於政治人物，籲香港人繼續做可以做的事。
記者：袁楚楚
案件原於昨日開審，早前表示不認罪的黃之鋒及林朗彥決定認罪，並已預料或會即時還柙。反送中運動以來警方拘捕逾萬人、2,300人被起訴，黃說他未有被控告暴動，甚至未被國安處拘捕，「反而唔知點解拉咗周庭。我仲有乜好怨呢？」他和周庭一樣，認為控罪相對輕，刑期不會長。他頓一頓，再說：「最盡，（本案）都係坐六個月監。你問我，咁都唔係好大鑊啫。」
黃知道將要認罪，仍密密工作，發表工作報告、出席營救12港人聲援工作、要求懲教署披露公務探訪審查細節，為鍾翰林疑在獄中受不當對待發聲……像有最後一口氣也要拼到盡。黃之鋒稱，很希望香港人知道 ：「我哋仍然有嘢可以做。」
黃之鋒很相信「actions speak louder than words」這句說話，「我成日都覺得，冇議席、冇議會、冇選舉唔代表冇嘢做。作為一個從政者，我繼續做我應該要做嘅嘢」。24歲的他，進出過監獄三次，就算坐監期間都沒停下來。「喺監獄入面投稿去《Time Magazine》，就喺上年6月，我喺大家遊行嗰個星期我做緊嘅嘢」。他並推動囚權改革、揭發壁屋懲教虐打手足等。他指大眾亦有很多事可以做，「做旁聽師、寫信畀手足，杯葛藍店及TVB廣告商、網絡戰線……即使7月1日之後，冇人再呼籲制裁，我哋都希望香港嘅抗爭有世界關注」。
這段時間黃不時到監獄探訪，「去探鍾翰林同其他手足時，我都喺度諗：『吖，可能過多幾個星期，我都要入去。』」他將第四度入獄，再次經歷綠色制服的懲教人員、灰白色的鐵牢和囚室，與有江湖背景的紋身大漢、難食至極的膳食朝夕相對。「坐監當然唔好受，亦好辛苦，但其實今日香港都有百幾人坐緊」，尤其壁屋這所青少年監獄，「呢個百幾人嘅監獄入面，已經有廿幾個係手足，即係每20個人就有一個政治犯」。
他不諱言，與友人逛街想買冬天衣物轉季，就想到或許整個冬天也在監獄度過，買了厚衣也得物無所用；看到聖誕裝飾時，會想起很大機會沒法自由地過聖誕和農曆新年，「但對比起𠵱家喺監獄嘅手足，連快必都無聲無息咁樣還柙咗兩個幾月」，還有百多位正關押的義士，以及12位身處鹽田看守所的港人，「或多或少都會有內疚，我冇自怨自艾嘅空間。」
他沒正面回答是否擔心再次入獄，「監獄嘅磨滅對我嚟講，都唔係啲咩苦難。陳健民同戴耀廷坐嘅時間都仲長過我三次坐監嘅日數；我反反覆覆進出，加埋都係坐咗百幾日，佢哋一坐坐咗成年，真係另一回事」。
黃認為，香港人的團結從來都並非取決於政治人物，而是取決定對家的打壓同社會氛圍，「香港人唔係未試過經歷低潮，亦都唔係未試過係低潮中搵希望。有啲嘢，大家唔想做、唔敢做、唔會做係人之常情。但係唔好着眼有啲乜唔可以做，反而要諗有啲乜可以做。」他看到很多人選擇不再積極參與公共事務，政黨代表就連傳媒訪問都推卻，「我會點體會唔到街頭、議會、國際戰線大幅收窄呢？再去辯證空間收得有幾窄已冇意思，鬼唔知收得好窄咩？而係有冇辦法收得咁窄，都有啲嘢可以做到」。
經歷過由反國教至今的高低起跌，黃之鋒說，當然感受到香港人的無力感，「去到低潮時大家就會想收山、唔參與，有好大無力感，其實香港呢一刻嘅狀態同2015年雨傘後有啲啲似」，但現時因為官司太多，整個社會面對的打壓如浪般冚來，「大家頂唔頂得住，大家都未必答到。每個人有每個人嘅選擇，但我覺得，都係要令世界知道香港人有頑強抵抗嘅意志。」
回想去年5月16日判監重返入獄時，他在獄中每日留意着運動進展，「我永遠唔會忘記，6月12號嘅朝早7點半8點，打開監獄嘅電視睇住CCTVB嘅新聞直播，我冇諗過會再有人群湧去夏愨道，真係好震撼」。6月17日服刑一個月後離開監獄，「勢估唔到，離開監獄前一日，就200萬+1嘅場面出現，之後有不同嘅示威」。
下次出獄，香港會變成怎樣？他說：「差到點大家想像唔到，但我覺得香港人從來都冇令世界失望過。」2014年雨傘運動低潮時，有人講「we will be back」被嘲笑，「大家都話係左膠精神勝利法，即係講完就算」。至2015年時有政治人物說大和解、要對話、解決社會深層次矛盾，冇人再提公民抗命，「有邊個估到，2019年會有一次咁風起雲湧嘅抗爭呢？」他認為打壓越大反抗越大，「呢個係一個博弈嘅過程」。
黃認為社會經過去年的洗禮有種韌性及基礎，「民意永遠都逆轉唔到㗎，政府真係可選擇炒晒啲老師、冚晒啲傳媒，為所欲為。以前好老套講『人心未回歸』，𠵱家可以講係『永遠都唔會回歸』，𠵱家大家就係個surviving battle度撑住」。
黃之鋒與其他年輕人一樣，總有很多未見的人想見、未去的地方想去、未做的事情想做。但轉眼已到上庭的日子，「我只寄望經歷的苦難不會教自己完全洩氣，反倒讓我與大家一樣，能夠分擔香港人這族群要承擔的苦難，自覺與有榮焉」。
