科大教授，一句Hong Kong belongs to the world，即刻被批鬥。內陸政權，從來對同外界接軌嘅港口城市，輕則猜疑，重則睇唔過眼要「撥亂反正」。
正如上次提過，港口城市，面對最大嘅威脅，就係俾內地政權內陸化，因為belongs to the world嘅港口城市，同內陸本來就好大嘅文化差異。內陸化嘅藉口林林總總，而過去一百年最流行嘅旗號，就係愛國主義。
香港作為港口城市一分子，當然走唔甩，不斷受到愛國主義包裝嘅內陸化威脅。但講香港之前，先睇睇其他清帝國裏頭，外國管治嘅地方。
香港係第一批由外國勢力喺清帝國開出嚟嘅城市，同期嘅有上海等等，所謂五口通商嘅五口。自此之後，陸陸續續，開始越整越多呢啲外國租界。呢啲地方，係幾時移交咗畀內陸政府嘅呢？
第一次世界大戰打完之後，民族國家浪潮，蔓延到亞洲。呢個時候喺中國，孫文提出反帝國主義，之後嘅蔣介石，就係以反帝反殖愛國英雄自居。1927年佢北伐成功之後，好快就開始着手取消租界。
例如，漢口英租界，北伐慶功同一個月，國民黨政府就號召廿萬人，去圍租界巡捕房，英資全部停業，租界裏面嘅僑民，全部漏夜搭軍艦或商船走佬，再過一個月，中英就簽約移交，漢口英租界光速執笠。
如是者，執吓執吓，去到第二次世界大戰，剩低上海天津等等。由於英美兩國需要中國喺亞洲戰場頂住，於是願意同中國簽新約。基本上，將以前嘅條約，一筆勾銷，所以當打完二戰，日本撤退之後，冚唪唥租界，就移交返畀蔣介石嘅中國政權。中國租界時代，正式完結。
咁香港呢？
北伐前夕，上海愛國運動，蔓延到香港，當時由蘇聯支持嘅廣州國民黨政府同共產黨，組織省港大罷工，係香港歷史最大型嘅罷工，罷咗超過一年，當時仲係靠轉口搵食嘅香港，全年出入口總值少咗一半，搞到政府要向倫敦借三百萬英鎊江湖救急。
之後到咗二戰中英新約，蔣介石要求英國放棄埋香港，不過邱吉爾堅決拒絕，蔣介石拉鋸一輪，最後無奈簽紙，至少收晒上海等等，都算係階段性勝利可以畀啲掌聲自己。就係咁，當全部其他租界取消晒嘅時候，香港避過咗1943年嘅中英新約。
到咗二戰結束，中國係戰勝國一員，蔣介石當然重提移交香港，但問題係英國都係戰勝國，兩國爭持不下，最終美國支持英國繼續管治香港，呢次係蔣介石最後一次嘗試奪取香港，而香港再一次走甩咗，避開唔使落入內陸政權手上。
跟住1949年，共產黨橫掃中國，但就冇殺埋落深圳河以南。之後1966年中國文化大革命，傳到落香港變成左派暴動，最終都冇推翻到港英政權。不過，喺1971年，埋咗條伏線。中共入咗聯合國之後兩個月，成功爭取將香港剔除出殖民地名單，令香港以後冇得享有聯合國認可嘅自決權利。即係話，一旦脫離英國，必然移交中國。
內陸政黨三番四次外合，但喺香港始終冇足夠嘅民意裏應，去移除英國殖民地政府。英屬香港，就算因為中國阻撓而冇民主冇自決，畢竟仍然係全世界最自由城市，每當去到緊要關頭，喺愛國同愛自由之間，香港人都係作出同樣嘅選擇。
到咗1984年，中英談判，最後決定始終要移交香港，不過鄧小平同志話：定啲嚟，話就話1997，但其實會回贈多五十年，加埋去到2046，比起上海足足多出一百年！同你一齊去埋聯合國登記，唔使驚中国走你數，唔通到時會話中英聯合聲明係張冇用嘅歷史文物咩！
於是，彷彿有九條命嘅香港，好似又避過一劫。
然後鏡頭一轉，嚟到2020年……
撰文：宋漢生
fb : sunghsblog