近半個月，全球主要股市都喺憧憬疫苗面世同擔心疫情惡化之間反覆，資金喺新舊經濟股之間輪動。港股喺第四波疫情下，部份資金又見轉向，由愛舊轉向愛新。周一恒指收報26486點，升0.1%，屬整固格局，支持位26000，阻力位26800。
喺防疫、限聚概念下，本地網購龍頭香港電視（1137）上周五反彈12.4%，周一再升3.1%，收12.74元。港視嘅業務同股價，都同疫情高度關聯，若疫情持續，有機突破前浪頂13.76元，形成雙底，上望16元。不過，落注港視要睇實每月營運數據，每每公佈翌日，股價都會波動。
大陸近半個月亦出現新一輪疫情，繼天津、上海、安徽後，內蒙古亦再現本土確診，患者居住嘅滿州里市要封城。上年底以嚟，疫情推升上網需求，受惠行業唔少得電腦業。據IDC報告，第三季中國平板電腦市場出貨量按年增長21.7%，創6年嚟單季最高按年增幅，但仍缺貨。瑞銀就睇好聯想（992），料會繼續跑贏全球PC同業，因有強大售後服務支持，有望擴大市佔率，因而調升其盈利預測同目標價，睇7元。該股周一破頂，收5.77元，升5.3%。走勢上，升破阻力位5.6元，呈現頭肩底同區域突破利好訊號。值得注意嘅係，該股周三除淨，此前買入可收中期息0.066元。
割柑人