揮春寫「一生平安」，會令人不安？民政署忽然變揮春專家，乜春才符合署方條紅線呢？庚子就快過去，大家畀啲選項，等民政署那班又唔做嘢（拉隊鬆人）又唔讀書的專員靠邊站，全民爆發揮春小宇宙，諗大啲：
「勇者無具」，寫畀盜用鬼滅之刃的差人，「提子太郎」那個具，唔係假陽性，唔使新冠檢測。冥冥中，無具等於絕育，無死全家的後顧之憂。
「壽終正寢」，出處來自鄭市長去年哽咽形容送中條例（是金句中的重中之重），揮春回贈給她，於禮正合。嫌不吉利？穿戴成套粉紅、拍晒掌頒發荷蘭水蓋給殉職公僕家屬，鄭市長顯然預先張揚了，壽衣也粉紅。
「旅遊嘔泡」，星洲炒米被跳老舞群組一戳，氣泡變嘔白泡，揮春貼在姓邱的額頭揮不走，指黑為白，made in HK的小企業，嘔緊血啊局長。
「侵侵制裁」「還清按揭」，年度最令人羨慕的揮春組合。被制裁反而能夠一筆過還清按揭，全世界以至大灣區，還有邊度好得過香港？點會不安呀，樓奴發夢都想做PK。
逢星期一至五刊登