前香港眾志秘書長黃之鋒、前成員周庭同前主席林朗彥就6.21參與包圍警總案噚日上庭，由於之鋒等人前一日已預告會認罪，有機會即時監禁，所以好多市民喺佢fb留言支持，仲話要去法庭聽審撐佢哋，但唯獨有一個人想去聽審，之鋒出po求佢唔好去，呢個係邊個？咪一向惹火嘅Lunch哥。
Lunch哥前晚喺fb出文，話星期一9點半之鋒喺西九龍裁判法院上庭，但10點鐘王婆婆又喺東區裁判法院上庭，「我兩場都有興趣，去邊度好？」點知呢個po一出，之鋒好快喺佢fb出文回應：「唔好去我嗰場，感謝」，仲要加個雙手合十求佢嘅emoji。好多網民留言為之鋒打氣之餘，亦不忘拎呢個po開玩笑，「姐係你陰王婆婆啦！」亦有人留言寸Lunch哥，「咩叫都有興趣？好開心好似睇英超揀邊場睇咁？」「有Lunch哥就好似有個陳百祥咁，個場變咗質。」
咁Lunch哥最終去邊個場呢？八方睇佢fb，佢真係去咗西九裁判法院，但又入唔到去，所以想趕去東區裁判法院，之後又出po話幾經辛苦總於比佢搵到張飛，可以入去西九裁判法院聽審。原本正正常常聽審咪算，點知又畀網民發現，之鋒等人還柙後佢出咗個po，但原來張相唔係佢影，而係來自協助12港人嘅鄒家成fb，結果又畀人圍攻佢做乜偷鄒家成幅相。
李八方