現年37歲的鄧麗欣（Stephy），17歲時由模特兒加入女子組合Cookies入行，當年的她唱歌被形容為「雞仔聲」，經過多年努力，成為現今影壇中演技備受肯定的女演員，更獲提名金像獎最佳女主角。Stephy蛻變過程中放下唱歌專注電影發展，她亦坦認歌手及演員生活相比下，後者更貼近真實的自己，令她活得更為自在開心。
入行接近20年的鄧麗欣，近年在電影上終於做出成績，她從一個總是為愛情受傷的「阿寶」，搖身一變成為《金都》隱瞞假結婚的「阿芳」。在現實生活中，Stephy的生活亦不斷求蛻變，求變的原因好簡單，就是要忠於自己。
正如Stephy所言，當年每一個階段的改變，都令她長大：「出道好幸運，多人照顧，乜都安排晒，變咗唔使自己安排太多。直到離開咗公司，自己要諗一個新方向嘅時候，重新去檢視自己。有一段時間我去咗內地拍劇，成個環境唔同晒要重新適應，嗰段時間算係轉捩點，由喺舊公司主力做一個歌手，之後決定向電影同演員發展，要擺多啲時間，呢個決定係冇人幫我諗，知道邊個位置係最舒服，最適合自己，所以都係一個大選擇，當然你唔可以話我係放棄歌唱事業，只係擺低咗。」
會否覺得有遺憾？Stephy笑說：「冇呀，好開心，呢個選擇係正確、舒服同開心，我可以好專注去做一樣嘢。喺過程入面，我自己都得到成果及認同。」之不過當放下歌手身份後，連帶緋聞與是非都減少：「我又冇為意喎，不過你講完又好似係。嗰時選擇唔係話唔鍾意唱歌，我自己都好享受出碟，喺台上唱歌同觀眾互動，但係歌手同演員嘅配套係好唔同，歌手行出嚟有唔同形象，變相娛樂性要大啲，好似難做返自己，我覺得自己唔係鍾意呢樣嘢，原來呢兩樣嘢係connect，我唔鍾意呢個配套，所以我鍾意呢個世界多過歌手嘅世界。」
現階段對Stephy而言，心態比其他更為重要：「我成日都覺得最緊要係自己嘅想法，冇人可以幫你決定未來，乜嘢方向，所以要調整自己嘅心態。我當係畀自己一個題目，呢行成長好快，我會畀自己一個好清晰嘅選擇，選擇咗之後要負責任，一直都係咁。其實我好少諗以前，亦好少諗好遠嘅將來，我覺得呢一刻係好重要，如果有一個機會喺面前，就一定要好好把握，太多嘢係自己預計唔到，不如好好做好目前嘅嘢，人生好無常。」至於會否有安排結婚這個題目？她笑說：「冇喎！反而係想做吓生意，呢啲又真係隨緣。」
採訪：唐琛悠
攝影：陳弘
化妝：Cyrus Lee of CyrusLee 1018
髮型：Vince Pang
服裝提供：Zadig & Voltaire of ITHK
