蘋果日報報導自從有咗國安法報料熱線之後，已經有過萬宗「報料」，真係得人驚，再發展落去嘅話，文革時代大陸人互相篤背脊爭住表態擁護偉大舵手嘅情況，可能在香港重現。本以為香港人質素修養會好一啲，不至於此。但難保不少鄉音不改之香港人可能本身就係有任務在身，混雜整體人群之中，隨時打報告。
左丁山成世人記住初入銀行時，負責一個中小企戶口，負責人係一個1970年從南越移居香港嘅三十幾歲年青人，1975年越共／北越趁美軍撤退，佔領南越之後，呢位L君家人走難不及，被越共清算，家產被充公，L君好彩畀父親一早遣走來港，倖免於難。曾問佢點解越共對佢屋企事業財產知道得咁快咁清楚，佢一路講一路流眼淚：「係自小與我玩泥沙一位小學中學同學告密嘅，原來佢一早已加入越共做卧底，我爸爸曾經在金錢上接濟佢好多次！」
於是乎，一班朋友敍舊，如見有新相識在場，一於發揮聆聽本領，盡量聽、盡少講，講波講馬可以盡情啲，講政治呀，咪學吓阿麟伯佢地口頭禪：「我對政治冇興趣囉。」本來香港人有慣言論自由、出版自由，變成「童言無忌」一族，但面對當今形勢，被迫變咗老油條，一於講少幾句為妙。譬如一位老友教書教咗三十幾年，行將退休，教藝術繪畫本來最容易獨善其身，點知前年畀老校叫佢教埋通識，通識科內有中國史，本來都可以借題發揮，刺激學生思維嘅，今個學期開課後，立即收到老校嚴肅指示：「上堂唔好講咁多個人意見，教中史唔好把個人意見，借題發揮！」易事啦，只要照住教科書課文內容照讀一遍就得，課外書唔介紹，政治問題唔講，學生識背書就得高分，於是皆大歡喜。左丁山批評佢咁教書法，對學生唔住，點知佢話幾怕學生「篤灰」，左丁山為之語塞。
一位自由身作家／編輯上星期對左丁山講，香港人好快識得自律，隨時行使「不給你印刷」的自由。呢位作家話本港印刷公司對印刷書本非常緊張，要先知道書本內容先至肯承印，對政治性強烈，有批判北京意味嘅書，一於話冇期，請幫襯另一家，另一家又推另一家，卒之搵唔到印刷廠肯承印。冇人同佢印刷出書，即是出版自由也沒有了，香港過往百花齊放，百家爭鳴嘅熱鬧情況，行將歸於沉寂。