8月底，高明推介台積電（TSM），當時股價79美元，上周二最高102.44美元，升幅超過29.67%。美國總統大選未有結果，美國傳媒擁立拜登，高明心入邊曾經諗過，如果拜登真係當選，台積電會唔會冇運行呢？
之後新聞顯示，台積電本身晶片嘅單唔只排到2021年，甚至傳出產能用晒，蘋果晶片定單接唔晒，要分畀三星。股價亦隨之上升，同期科技股普遍浮浮沉沉，晶片股如AMD同NVIDIA都無法破頂。
疫情之後只係炒緊一個概念，就係產品嘅供應短缺啲，定係鈔票短缺啲？經過咗奧巴馬年代嘅量化寬鬆，我哋明白到量寬有幾件事情會發生：高度借債發展嘅公司唔會死、收益率會跌到有咁低得咁低、任何有穩定收入嘅公司都會成為市場上邊嘅稀有品種。
霸權嘅來源，就係你唔用佢，冇第二個揀，最後令到公司嘅收入非常穩定，年年都有增長，過去升幅強勁嘅訂閱股（SaaS）就係呢個原理。至於台積電，晶片嘅技術喺過去十年超越其他所有工廠，更加因為佢冇消費產品，出現獨立性，初步產生技術造成嘅壟斷地位。
美國對中國晶片進行禁運，令大家明白極細納米嘅戰略地位，直接畀侵侵吹起咗晶片嘅估值。英特爾宣佈7納米晶片要延期，原本龍頭技術青黃不接，市場出現移位，加上蘋果亦都離棄英特爾，設計代工分家模式取代一站式晶片工廠，台積電喺呢個歷史夾縫之間成為晶片界中游嘅霸主。
至於5納米嘅晶片，唔係㩒個掣就有，相對美元真係㩒個掣就印，台積電有稀少性，據報3納米2022年下半年量產，2納米最快2023年量產，相對Intel延期後約2022至2023年出7納米，美國邊位做總統，都唔會開倒頭車，台積電只要保持技術領先，實長做長有。繼續冇目標價，持有到2024年至檢討。
高明