周日日職大阪飛腳作客浦和紅鑽,只要飛腳失分,喺上周六輸波嘅川崎前鋒就可以提前封王。今場紅鑽仲係先開紀錄嗰隊,61分鐘由兩位中堅合作,湯馬士丹治頭槌傳槙野智章門前撞射得手,相信呢刻連川崎前鋒啲球員都慶祝緊。點知4分鐘後飛腳就憑宇佐美貴史追成1:1,到81分鐘,再由高尾瑠接應角球頂入幫飛腳以2:1反勝紅鑽,令前鋒奪冠都仲要等多陣。今輪封王唔成嘅前鋒,𠵱家最快要等周三自己主場鬥大阪飛腳,到時前鋒只要唔輸,就可以拎到球會史上第三個日職冠軍。