巴塞隆拿上周六喺西甲，因門將達史特根嘅「紐亞式」出迎「派大膠」，作客以0:1輸畀馬德里體育會，中堅碧基仲因為扭傷右膝，隨時要長唞半年，認真濕滯。今次亦係施蒙尼2011年接手馬體會以嚟，第一次喺西甲擊敗巴塞。
喺德國國家隊長期屈居紐亞之下嘅達史特根，不時都會學吓對方出迎攔截，佢今場又再東施效顰，點知就出晒事。上半場踢到補時階段，壓咗上前場嘅碧基控失波後，俾馬體會嘅安祖哥利亞截咗個波，仲即刻大腳吊上前場，正當棄關出迎嘅達史特根諗住好有型咁解圍嗰陣，竟俾主隊嘅恩歷克卡拉斯高「通坑渠」過咗，眼白白睇住對方推到禁區外射入空門。單係呢吓災難級失誤，就知達史特根咁多年都動搖唔到紐亞德國首席鋼門嘅地位，唔係冇原因嘅。
其實巴塞失波後，都唔係冇嘗試反撲，但攻唔入馬體會大門之餘，碧基仲喺59分鐘俾安祖哥利亞撞傷右膝，被迫退下火線。雖然佢總算勉強可以自己行出場，但睇佢個痛苦表情都覺得唔多對路，西班牙《每日體育報》就話，呢位33歲老將可能要長唞4至6個月，如果係真巴塞就大鑊，因為烏姆迪迪同朗奴阿拿奧祖本身都有傷，佢哋𠵱家只係得基文迪朗格勒一個健康中堅，嚟緊可能又要靠法蘭基迪莊做替工。禍不單行，右後衞沙治羅拔圖今戰亦因拉傷大腿，將會休戰大約兩個月。
巴塞對上一次喺西甲輸畀馬體會，已係10年前嘅事，而巴塞今季8戰只得11分，亦係佢哋自91/92年球季以嚟最差嘅開季成績。不過各位巴塞迷唔使太灰心，事關當年佢哋最終都成功壓倒宿敵皇家馬德里，捧走聯賽冠軍。
其實皇馬今季都唔係好得巴塞好多，佢哋上周六喺西甲作客維拉利爾，就俾對手逼和1:1，又唔見兩分。雖然皇馬開波僅僅105秒，就憑馬里安奴戴亞斯嘅頭槌打開紀錄，但染完武漢肺炎復出嘅夏薩特今場完全冇料到，到65分鐘退下火線前，無論射門、威脅傳送同傳球數字，全部都係0。門將泰拔高圖爾斯喺76分鐘仲要喺禁區內撲跌卓禾斯輸12碼，結果謝拉特摩蘭奴一射中鵠，為「黃色潛艇」追和1:1，喺各項賽事不敗嘅強勢延至10場。
