虛銀和滙豐就eDDA收費的抗衡未完，支付寶香港最新唔再支援扣賬卡服務，虛銀又中箭。
Mox Bank最新在手機應用程式通知客戶，指支付寶香港不再接受綁定任何扣賬卡，包括Mox Card，建議客戶以其他電子錢包繼續使用Mox Card。眾安銀行都有同樣情況，該行已發電郵通知客戶，稱收到不少用戶反映，稱無法在AlipayHK以ZA Card進行電子付款，該行已就事件了解及進行磋商，已確認AlipayHK只支援萬事達卡及VISA卡，暫不支援扣賬卡，建議客戶移除連結，改用其他支付方式。
業界對於支付寶香港叫停支援扣賬卡服務大惑不解，暫時未知道觸發支付寶香港決定的原因，據講連滙豐debit card都唔能夠喺支付寶香港使用。
支付寶香港有逾200萬用戶，而且接受支付寶香港的商戶眾多，唔少港人都真係用慣咗，小額至淘寶交易，大額至幫仔女交學費，睇嚟對虛銀嚟講係有一定影響。
先在eDDA上遇一大難題，再被支付寶香港趕絕，令扣賬卡使用遇掣肘，虛銀角色被動，要在港完成推動金管局「普惠金融」的任務，似乎甚是艱難，唯有寄望虛銀能化被動為主動，積極與巨擘周旋，為用戶提供更全面的服務。
換個角度諗，支付寶香港只持有儲值支付牌照，但吸客200萬，customer base隨時比中小行多，過往燒錢一段時間，現時終於到收網嘅時候。今次拒絕銀行扣賬卡玩呢個party，無非想爭返些少話語權，江湖從此多事。
另外，日前中環十一少專欄提到滙豐、Mox Bank等銀行採用疑似「真人工，假智能」的服務供應商Jumio，以大量廉價印度勞工做eKYC、監測交易。杜夫人都有聽過業界講法，稱Jumio一個check低至幾蚊港紙，以鑑定開戶者身份證真偽，再比對閣下臉容與身份證的相似度，贏得不少合作機會。
要知道銀行揀供應商之前應該有多重考慮，據講Mox喺開業前有就服務供應商進行內部審查，以及審計和評估程序，又會為識別和驗證程序作詳細的人手品質保證檢查。
咁大間銀行，又有金管局睇住，照計就無問題嘅！
杜夫人