政府上星期推出「安心出行」app，好多人恥笑個名好似「安心偷食」出軌事件，個app喺推出首日仲被發現Android版過度收集手機私隱，令市民對個app反應更冷淡。創科局長薛永恒可能怕交唔到功課，前日再獻新猷，聲稱不排除強制市民裝app。不過薛永恒話不排除強制市民裝app，好快又變成IT人同網民恥笑嘅目標，有網民話想睇下創科局局長有乜創新科技，點樣幫佢部Nokia 3310或者PalmOS手機、仲有大批長者專用手機，強制裝「安心出行」app。
最先挑薛永恒機嘅係「前線科技人員」小編，佢哋喺facebook出po，表示好心急想下載「安心偷食」，但點搵都搵唔到，搞到唔敢出街，猛問局長點算好？八方睇佢哋貼嘅智能手機相，原來係一部「史前」手機Palm phone嚟，呢部手機既唔係行Android，又唔係行iOS，係行PalmOS系統，而且部手機仲可以正常使用。唔講唔知，PalmOS系統90年代推出時仲紅過蘋果公司產品，好多網友留言都話好想出返部新機，用嚟避開監控簡直一流，仲講笑話應該有炒價。
「前線科技人員」笑完薛永恒，到連燈仔接力，個個拎晒Nokia 3310等各系列手機出嚟，部部插SIM卡之後都用得，於是齊齊問局長有乜創新科技可以裝到「安心出行」app，如果要強制市民裝app，拎部Nokia出街又冇裝app算唔算犯法？係咪會修例凡帶非智能電話出街即犯法？仲有網民話，好多長者專用嘅平安手機都冇得裝app，咁長者又點算？到時班公公婆婆無裝app無得去飲茶，又係製造民怨喇。
李八方