Apple部份產品提供個人化鐫刻服務，不過可以印乜就唔係個人化決定，要過兩關審查，之前有買咗Apple Pencil嘅市民想鐫刻「liberate HKERS」被拒，即係釋放港人嘅唔得，而呢種「打壓」係全方位、不同階層，不過勢估唔到連同志平權都係禁語。
南區區議員袁家蔚有份搞嘅社交網站專頁「番號ABC」喺fb出post，話佢哋之前又係買咗Apple Pencil，希望鐫刻「LIBERATE HK GAY」，點知Apple告知購買失敗，對方員工解釋係系統判斷相關字眼屬於敏感，交由「上頭」人工審核；換言之，刻字服務有兩關審查，佢哋覺得香港Apple係有系統地針對敏感字眼，只係估唔到連同志平權嘅字眼都係其中之一。
佢哋話，就連Apple嘅CEO Tim Cook都喺2014年公開出櫃，又推廣建立性別友善嘅職場，每年都會推出彩虹產品向性小眾群體表達支持，但偏偏香港Apple竟然連「LIBERATE HK GAY」都容不下，認真諷刺，質疑Apple歧視埋自己嘅CEO，又或者一直只係將同志平權商品化。
李八方