今年fit到爆嘅挪威前鋒艾寧夏蘭特，成功壓倒多蒙特隊友查頓辛祖、巴塞隆拿翼鋒安素法迪、曼聯射手格連活特，同埋曼城嘅菲爾科頓等超級新星，攞到本年度歐洲金童獎，認真威水。
呢個獎項由意大利《都靈體育報》喺2003年創辦，由《隊報》、《馬卡報》、《泰晤士報》同《圖片報》等歐洲各地媒體負責提名同投票，選出歐洲最強嘅21歲或以下新星。以往嘅得獎者入面，唔少最終都可以成為頂級球星，當中最有代表性嘅，就梗係2005年贏出嘅巴塞球王美斯，而朗尼、阿古路、保羅普巴、史達寧同基利安麥巴比都一樣攞過呢個獎，證明班評審嘅眼光真係有番咁上下。
今年只得20歲嘅夏蘭特，喺1月冬季轉會窗以2,000萬歐元（約1.84億港元）身價，由奧地利班霸薩爾斯堡轉投德甲勁旅多蒙特。雖然季中先加盟，但夏蘭特上季喺各項賽事，夾埋為多蒙特踢18場就入咗16球，到今季依然冇人阻到佢，踢11場已經有11球斬獲，即係全年計29場波入咗27球。夏蘭特今年仲做埋挪威大國腳，頭7場國際賽已入咗6個波，效率真係高到嚇死人。
有咁嘅表現，當然有大把富豪球會吼實，前排就有報道指，皇家馬德里同曼聯都已經虎視眈眈，隨時準備出手搶人。不過，佢嗰位踢過列斯聯同曼城嘅阿爸賀蘭特，近排接受傳媒訪問時就話，有大球會睇中阿仔一啲都唔出奇，但佢哋既然同多蒙特簽得長約，就梗係冇咁快諗住走。
事實上，有唔少球評家同球壇名宿，都睇好夏蘭特有潛質成為世上最強球星，有朝一日或者會當選世界足球先生。國際足協啱啱就宣佈，本年度世界足球先生、世界足球小姐、最佳11人同最佳教練等獎項，將會喺下月17號透過網上公佈，至於候選名單就會喺今個月26號公佈，到時就會知道夏蘭特有冇份角逐今屆嘅獎項嘞。