訪問前，狠狠地重溫了盧巧音的歌曲，回憶總是美麗的，念念不忘她在油街的第一個個人音樂會，《垃圾》一起，全場毛管戙。這天見到她，一身鮮艷民族風，精神利落，最近又《Chill Club》又出新歌，說她「出返嚟活躍返」，她說：「其實我冇匿埋過！」
當然，她的高山低谷起起跌跌，又是另一個故事。總覺得，盧巧音的歌聲或許不是最完美，但香港樂壇不可能沒有盧巧音的聲音。
多年來都替盧巧音不值，覺得香港樂壇欠了她，劣幣驅良幣。今天46歲的盧巧音說：「我冇怨任何人！樂壇冇辜負過我，入行嗰時起碼都叫做沾染過光輝，我唔覺得有乜對我唔好，同埋主因係，我自己都覺得自己做得唔好，我都覺得自己唱得唔好，寫歌做戲各樣嘢我都覺得自己未係最好，我仲點會要求你要畀乜嘢我呀？」
她的新歌叫《旁觀他人之痛》，多年來她都與痛同行，皮肉的內心的，「我都諗唔到有幾痛，可能已經過咗去……痛完之後，恢復咗又唔覺得係咁痛囉！」
盧巧音的痛，她是當局者。
撰文：文嘉龍
《旁觀他人之痛》歌詞講及戰爭場面，旁觀着各種不同的人生之痛，盧巧音說：「好切合𠵱家呢個所謂世界氣氛，來自整個世界大環境，唔係淨係香港，旁觀嘅人見到一啲戰亂，見到一啲唔開心嘅事，其實都可以去痛！」
盧巧音的人生，經歷了很多不同的痛，「之前痛，可能係隻歌上唔到榜而痛，或者同男朋友分咗手好痛，或者同屋企人鬧交，因為工作有啲不快好痛，呢啲都曾經經歷過，相對地𠵱家平靜好多，𠵱家既來之則安之，佢要發生一定會發生，某程度上人大咗，你會轉一個角度去睇呢一件事！」
2011年在廣州的演唱會現場，盧巧音在台上說要退隱，都快10年了，今天她坦言：「嗰次係有少少發晦氣㗎！其實你唔捨得唔唱，只不過嗰下覺得，我做咗咁多嘢，點解都好似麻麻地……」2002年《好心分手》的成功，也為她帶來身心的痛，「《好心分手》好勁啦，自己handle唔到，但未開始演變到一個病，我覺得佢會喺入面潛藏一段時間，幾年之後先至trigger（觸發）出嚟，應該2012年係最唔穩定嘅時候，2012年開始我就需要睇醫生，真係影響到工作同生活。」
情緒病爆發前，盧巧音一直受甲狀腺問題和罕見眼疾困擾，「我眼珠同眼瞼郁唔到，斟水各樣嘢都對唔到焦，談何行樓梯呢？所以嗰一年頒獎禮，有啲歌手朋友係陪住我拖住我上台。2002年有兩個病，甩頭髮係甲狀腺併發症，之後我隻眼睇唔到係Tolosa-Hunt Syndrome（陣痛性眼部肌肉麻痹），通常60歲以上人士先有，嗰時我去政府醫院睇，好多醫生圍住我，佢哋搞掂咗我呢個病，將我呢個case send咗去一個類似醫學總部，做咗一個reference，因為比較少後生女有呢一個病。」
醫好了身體的痛，又到情緒之痛來襲，「你唔去正視就好嚴重，你要去面對自己精神上係有問題，唔好躲避，唔好覺得自己黐咗線。精神有問題就需要睇醫生，所以好平常，我嗰刻決定去面對佢，我用咗兩年半時間同醫生一齊去對抗呢個病。」
除了食藥，跑步成為盧巧音的另一種治療，「徹底好返晒！做咗運動，心情就會好好多，哪怕係半小時或者一個鐘，你都可以放空，你淨係會留意自己嘅呼吸、脈搏，你好專注，你會將自己唔開心或者壓力暫時放低。我係跑街，你會望到風景，你會同其他人打招呼，亦都係一個好紓緩嘅過程！」
她不是講玩的，竟然身體力行參加了名古屋和紐約的馬拉松賽事，順利跑畢全馬。在紐約的那一場賽事，她起步不久已經腳抽筋，其間見到隊友亦出了狀況，隊友叫她跑先不用等，但盧巧音堅持與隊友同行，「一team人一齊啦，自己又唔係跑得好快嗰隻，有乜所謂啫，大家一齊去New York，一齊去進行呢個賽事，自己跑可能會快少少，但呢個唔係我想要嘅嘢，team work一齊去完成係最緊要！」真正齊上齊落。
有誰會估到盧巧音會愛上跑步，獨立樂隊出身的她又rock又烈，是當年的樂壇烈女，原來，煙，一早戒了；酒，已經很少飲。「人哋點樣睇你係人哋諗法，自己做好自己囉！我唔會expect一個唔鍾意我嘅人突然間鍾意我，我諗時間可以證明我，𠵱家年紀又大咗，唔需要去同人拼，你會覺得由心出發，實會有人feel到，實會有人俾你感染，所以唔使刻意囉！」
1998年唱《垃圾》出道的盧巧音，之前早有夾band經驗，1994年她已是獨立樂隊Black & Blue的主音。想不到，近年因為跑步，相識快30年的隊友成為了跑友，「五個成員有三個都跑過馬拉松，我跑咗步再meet返bass佬，先知道佢跑山都跑咗一段時間，結他佬就啱啱起步。好開心，開心過一齊jam歌㗎，咁耐冇見，大家幾廿歲，大家都有家庭有仔女，我都諗唔到我哋三個可以『喂，老考，聽日禮拜六跑步，好呀好呀』，我每一次同佢哋跑完，我都有個tag就係『跟住哥哥去跑步』，係好家庭呀件事，識咗咁多年，又因為跑步增加咗啲感情。我估其他band見到我哋咁都會妒忌，我哋1993年認識，我1994年先入隊，都一齊咗26年，唔係一個短時間，所以就算咁耐冇見，見返都有一個默契！」
盧巧音說，很多事情和得着，用錢是買不到，「你嘅經驗，你嘅快樂，你嘅傷心，你嘅得着，所有嘢都係用錢買唔到嘅時侯，就唔使第一樣嘢就係講錢囉！我唔會話自己冇經濟壓力，因為我有屋企，我都有爸爸媽媽，我都有負擔，但係好彩我哋都係一啲好平實嘅屋企，唔係開支好大家庭，未至於好慘，亦都未至於好風光，我諗呢一行好多人都係咁，我覺得𠵱家有機會做嘢，盡量把握機會囉！」
錢不是萬能，但冇錢萬萬不能。娛樂圈表面風光，盧巧音的生活卻十分貼地，每天自己買餸煮飯，「曾經有個朋友問我，知道我煲湯，佢話你叫工人幾多點去買餸㗎，我話我自己買㗎！好多人有呢一個錯覺，你喺呢一行一定有啲錢，一定有車有樓有工人，錯！唔係每一樣都係你哋睇嗰個實相，當你親身經歷去買餸去超級市場，你會覺得生活有體會，唔使樣樣嘢都放唔低嘅！」
步入理智之年，盧巧音如今不烈不辣，身邊還有個結婚七年的老公蘇浩才（Sammy），一起走過高山低谷，「高高低低，你要去扶持隔籬嗰個，或者俾隔籬嗰個扶持你！咁多年高山低谷，我諗每對couple都會遇到，每一個上上落落，你同你隔籬嗰個經歷，一定會學到好多嘢！對方如果真係心情唔好或者想鬧交，俾佢鬧囉，俾佢發洩咗出嚟就冇嘢，唔好同佢衝撞。我性格都係比較急衝住去，有時都會有火爆情況出現，是旦一方都要去遷就下，有時有啲嘢唔係你0.1秒講出嚟就代表啱，都要去冷靜下先同佢講！」
當年唱過《很想當媽媽》的盧巧音，現實中與老公一早有共識不生小朋友，夫妻間「情趣」要互相都有空間，「佢𠵱家參加嘅活動，譬如居合道或者打boxing，佢都有嗌我一齊去做，但我就推卻，第一我冇乜興趣啦，第二就係應該有一啲活動要有返大家嘅空間，不如我退後一步，你哋去玩啦，我自己去跑下步行下山，反而大家返到屋企仲多嘢講。」
盧巧音結婚初期亦正是治療情緒病期間，她曾退居幕後幫老公的樂隊Kolor處理工作，錢雖然搵得不多，但卻學到很多。近兩三年來，各方面的狀態都是盧巧音最平靜的階段，「將來嘅事，我唔知，但係唔好停，我唔知我會唔會出大碟㗎，可能會，唔好框死自己先，總之用個心去做囉，唔好問有冇錢先，你下下做嘢去問回報，其實冇癮㗎！」正如今年6月，周啟生為演藝界幕後人員籌款而舉行的網上音樂會，盧巧音就義不容辭作嘉賓演出。
「唔係淨係我哋呢個行業，其實全香港全世界都大鑊，但係點樣喺呢個逆境keep住正能量呢？事情都發生咗，我自己嘅選擇就係去面對佢，你見到百業蕭條㗎，但係冇辦法，自己做好啲囉，發表啲作品啦，你可以寫下歌，可以唱下人哋寫嘅歌，可以同人合作，唔係淨係坐喺度鬧或者坐喺度怨，咁樣唔係啱嘅態度，乜嘢狀況都好啦，香港人係叻仔㗎嘛，逆境都要去面對囉！」
盧巧音的痛，還有她身上那十多個的紋身，最新紋到上頸的圖案，見到都覺得痛。疫情關係，紋身師不在香港，其實圖案是未完成的，「我都唔打算將佢完成，隨緣啦！」
紋頸好痛？「我篤你痛唔痛，梗係痛啦，成個過程就係你點樣去面對呢個痛苦，好似好變態，唔識講，呢個皮肉嘅痛加埋紋身師同你一齊去進行呢個紋身，其實係似治療嘅一個過程，心靈上好似經歷咗一啲嘢，你好似會睇化咗某啲嘢，好似好amazing，但係真事，因為呢個紋身都幾heavy㗎個工序，你要好齊心同佢一個頻道一齊去做呢件事，呢個經歷好得意！」
應該係最後一個紋身？「有可能係，暫時足夠囉！」
痛完，就好。
化妝：Macy Chan
髮型：Nicole＠Xenter
服裝提供：流蘇民族百貨
場地提供：Jaa Bar