朋友T嘅親戚自紐約回來，講及亞裔美國人對特朗普觀感，其中印度裔特別支持拜登，因為副總統候選人賀錦麗（Kamala Harris）有印度血統，她爸爸是牙買加黑人，名Harris，教授一名，但賀錦麗小時候，父母已分居，由印度母親養大，所以與印度親戚如舅父等仍有緊密聯繫。美國民間相傳，拜登已78歲，賀錦麗一個唔覺意會成為詹森第二（即甘迺迪遭刺殺後，副總統詹森做咗總統）。朋友T話：「印度裔比較支持拜登，大有理由，一旦中印邊境發生衝突，你話賀錦麗站在那一邊？」
印度總理莫迪，本來想努力與習近平建立友好關係，又想搵馬雲去印度投資新科技，料不到喜馬拉雅山邊境起風雲，印度士兵有死傷，中印關係立即蒙上一層冰霜，為咗自保，印度居然打破自尼克魯時代建立嘅不結盟傳統，海軍靠攏美國，加入一個叫做Quad嘅聯盟，與美國、澳洲、日本一齊做海上軍事演習，英國、法國海軍離開太平洋南海甚遠，亦會派海軍艦艇巡遊南海一帶海域，中國會唔會感到頭痛？胡錫進等中國評論員當然話「驚都未驚過」，但印度海軍離開印度洋，駛入太平洋，就豈只係一種姿態，直情係下定決心要靠攏美國來保護印度利益。
特朗普當權，印度已經表態支持，到拜登賀錦麗入主白宮，印度會覺得有內應，更加安心。拜登聲言會組織一個美國歷史上最多元嘅內閣，即係話搵多啲女士、黑人入閣，派豬肉，亞裔、拉丁裔、LGBT一定有份。目前已有傳言，三大內閣部門，國務院、財政部與國防部都有女士成為熱門人選，其中國防部有一位前奧巴馬政府嘅Michèle Flournoy，60歲，哈佛畢業，牛津文學碩士，曾任國防部最高職位之女性（Under Secretary of Defense for Policy），今年6月在外交事務（Foreign Affairs）發表美國對華軍事策略文章，指美國需要建立一支有能力、有決心，可於72小時內擊沉全部中國之南海艦隊（包括潛水艇及商船）嘅海空火力！當中國明白美國有此實力，就會對攻佔台灣三思！呢位女士如真的入主五角大廈，加上賀錦麗，必定為中國增添麻煩。