求驗客手記:前鋒輸波今日先封王?

求驗客手記:前鋒輸波今日先封王?

喺日職榜首遙遙領先嘅川崎前鋒(圖右),上周六喺大部份時間少踢一人嘅情況下,作客以0:1輸咗畀大分三神,錯失提前封王嘅機會。不過,若然目前排喺積分榜第二位嘅大阪飛腳,今日作客對浦和紅鑽攞唔晒三分,前鋒仍然可以提前六輪鎖定冠軍。賽前被睇高一線嘅前鋒,上半場34分鐘有隊長谷口彰悟,喺禁區內犯規直接領紅牌兼輸12碼,野村直輝操刀為三神射成1:0。前鋒失球後雖然搶番唔少攻勢,但始終射唔爆對方大門,最終以一球落敗。全失三分之後,前鋒以29戰得72分繼續排榜首,拋離少踢1場嘅飛腳17分。只要飛腳周日贏唔到,前鋒就可以攞到球會史上第三個日職冠軍,送別今季結束後就會掛靴嘅中場名將中村憲剛。