【名家足路】【對決場次︰錫菲聯vs韋斯咸】
錯就要認，打要企定；上星期輸咗克羅地亞，都係冇咩藉口，睇埋佢哋之後再點輸埋畀葡萄牙，球隊心態真係及唔上對手，始終歐國聯又唔係世界盃、歐國盃呢啲大賽，以後類似情況都真係好好考慮。今周歐洲主流聯賽重開，《一燈決》第三輪就揀英超錫菲聯主場對韋斯咸，一字記之曰：心，韋斯咸心態一流，淨係呢一點，就算讓平/半，都足以撐客隊啦
英超踢左八輪，當中都有唔少經典場面，好似阿士東維拉炒利物浦7:2，李斯特城炒曼城5:2，不過韋斯咸落後0:3嘅情況下，可以鬥至最後一刻，連追3球逼和熱刺3:3，都真係幾出色，睇番𠵱家熱刺仲升到上聯賽第二位，槌仔幫可以作客拎到一分都算係咁。個人對韋咸領隊莫耶斯就冇乜好感，排陣保守，5-4-1陣式，中後場填滿人，先穩住後防，然後靠有效率嘅反擊爭取入波，不過勝在莫耶斯逼到班球員盡心拼搶，呢啲先重要。無可否認前鋒米查利安東尼奧仍然缺陣，對佢地攻力影響好大，不過以佢地開季至今八場比賽，都有七場入到波，用法國仔施巴斯坦賀拿打單箭頭，都唔算太遜色，今季作客只係輸過畀阿仙奴同利物浦兩支勁旅，有能力大勝李斯特城，點會怕錫菲聯。
英超暫時得三支球隊未贏過波，錫菲聯係其中一支，唔係話錫菲聯冇心，不過真係睇得出佢地有心無力。上季靠穩守突擊成為英超黑馬，可惜鋼門甸恩軒達臣要返曼聯，守又守唔到，攻又唔入，開季至今得一分，仲要係從難兄難弟富咸身上攞到，一日未贏波，一日都繼續追佢對家。
文：牽牛
《一燈決》係今季新欄目，由上月擂台盟主同上月燈神拗吓頸，睇吓讀者信邊個。