【名家足路】【對決場次︰錫菲聯vs韋斯咸】
上周歐國聯瑞典對克羅地亞開平手盤，主場嘅瑞典最後贏2:1，而我捧主隊勝，贏番牽牛兄一次，今周就要乘住個勢再下一城，證明呢位上個月嘅一哥唔係咁把炮。
今次我哋揀嘅係錫菲聯下周日主場對韋斯咸呢場英超二線波，講真要錫菲聯呢支排緊榜尾嘅球隊，係有風險。錫菲聯今季一場不勝，呢場波開多佢哋成10分嘅韋斯咸讓平/半，都好正常。不過有時就係要富貴險中求，韋斯咸冇咗波牛米查利安東尼奧喺前面衝衝撞撞，當堂進攻威力弱咗好多，上周主場對富咸只係險勝1:0，而且唔係對面個盧卡文玩嘢，補時球12碼整個chip射俾龍門捉到路，呢場波應該1:1收場。
韋斯咸呢場作客，更加冇穩勝把握，況且上季佢哋嚟到呢個球場，都係輸波而回。錫菲聯今季1和7負，論成績完全處下風，但有少少戥佢哋慘係，開季起碼對咗四支Big 6球隊，而其他對手就係狼隊、列斯聯同阿士東維拉呢類今季排前列嘅奇兵，得富咸一隊比較屎，所以搶得一分，我覺得今輪國際賽周過咗係時候反彈，同海鮮波嘅韋斯咸硬碰硬，主場應該有得打，受讓梗係要捧。
另外，仲有場推介係深夜利物浦主場對李斯特城嘅大戰，紅軍後防傷兵咁多唔完整，點睇實養精蓄銳嘅李城前鋒占美華迪？不過，我覺得佢哋前線雖然冇穆罕默德沙拿，都有腳風順嘅沙迪奧文尼同迪亞高祖達，所以入球開「大」好有信心，不妨就串埋受讓嘅錫菲聯整條過關。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。