現年29歲、私影女模出身的袁晴晴（CoCo）在2014年與一名男子見面期間，拿走對方手機，當時她遭到網民圍插兼說她整容，事後她哭訴「我唔係雞」，又自稱是基督徒兼是處女之身。消失一段時間的CoCo，最近捲土重來，以藝人身份參加ViuTV真人騷《全民造星III》，一出場便被監製「花姐」黃慧君篤爆「扮喊」，靠負面新聞博上位，不過即使被叫退選，但她依然堅持繼續。
雖然CoCo首輪已經被out，但她重新吸引到網民注意，她日前接受《蘋果》訪問，再三否認自己有整容，只是會執相放上社交網：「我只係做一啲香港女仔鍾意做嘅嘢，P唔P都俾人話，唔爭在，人哋影得我唔靚，我沉醉自己P圖世界，真人我冇整過，冇做傷天害理嘅事就OK啦！話我俾人包，其實我永遠唔會坐頭等飛機，每次去旅行帶多幾套泳衣，自己拎腳架自拍，營造一個公主生活，人哋點講由得人，我覺得自己係一個好女仔，力爭上游搵錢買花戴。」
對於被標籤做「公主病」，CoCo絕不承認：「我唔煙唔酒唔蒲，唔覺自己有公主病，因為我冇公主命。」原來CoCo出身草根階層，住公屋，與媽媽和弟弟相依為命，盼望一天飛黃騰達：「我會考有25分，我對自己要求係拔尖入大學，但最後只考入中大神學系，所以冇讀，我唔想為一張沙紙讀書。我好想畀好啲生活屋企人，出嚟打份工幾萬蚊，有啲浪費我青春，我覺得自己值得搵更多。」當時CoCo轉去讀音樂，做過活動司儀及私影：「我都有拍過吓戲，做男主角身邊性感女伴。」
重提當年的盜竊案，她咬牙切齒表示自己從沒有做過援交：「讀書時同學已經覺得我係，早幾年會唔開心，但難聽啲講，幫襯過我咪出嚟講，呢行有做過有個價，起碼我唔係on list！」CoCo自言潔身自愛，因為不想對不起已過世的媽媽，她哽咽地說：「我嫁人都要身家清白，唔好對唔住媽咪。嗰件事（偷竊）已經愧疚佢，𠵱家媽咪離開咗，得我同細佬相依為命，人生冇乜輸，所以細佬好重要。」
