阿仙奴一隊大部份球員今個國際賽期都要幫國家隊比賽，冇俾人徵召嘅巴西後衞大衛雷斯同西班牙中場丹尼施巴路斯，本來留喺球會備戰下周日英超鬥列斯聯，點知上個禮拜五操練佢哋就爆發衝突，雷斯俾施巴路斯鏟截之後出手打人，後者成個跌咗落地，個鼻仲留低咗條血痕，最後要由領隊阿迪達出面分開，兼打發兩條友返屋企，好彩佢哋事後已經互相道歉。
同樣喺國際賽期冇國家隊任務喺身嘅韋利安，疫情期間理應要留喺英國，但呢位巴西翼鋒居然偷偷地飛咗去杜拜，返嚟就同阿仙奴解釋話自己係去公幹，履行喺亞洲嘅肖像合約喎。雖然唔使隔離啫，但佢嘅病毒檢測要呈陰性先可以返去訓練，需知道艾利尼同哥拉辛拿斯早前感染武漢肺炎要缺陣，家陣連韋利安都有機會出唔到，搞到阿迪達要排陣都好頭痕。