朋友T嘅親戚自紐約回來，隔離14天後與朋友T吃飯，講機場檢測講到一肚氣。朋友T嘅親戚係平面設計師，居紐約多年，呢次因母親有病，趕住回來，四十幾歲人咯，坐長程機回到香港，在赤鱲角落機都已非常疲倦，要在二號客運大樓與眾人排隊交表，一個人一張枱應付客機乘客，於是大排長龍，排隊攞到一個樣本瓶，吐口水入內，交回作檢測用，四小時後，等到呆咗嘞，獲通知係陰性，可到酒店隔離，但冇講幾多點鐘去到，呢位朋友諗諗吓，如其他人一樣，去到酒店附近搵嘢食，入超市買雜物乾糧，最後至返酒店，全程無人理會。
朋友T一聽，即刻講：「嘩！整個流程漏洞多多，容乜易隱性患者傳染咗畀香港街坊都唔知！」設計師話：「你知咪好囉，聽講香港特區政府有好多錢，但點解機場咁少人做嘢嘅呢？好似完全冇人策劃，冇人監督外來客到達香港之後嘅嚴格檢測，會嚇死你地位袁國勇㗎。」朋友T唯有苦笑，香港衞生署、防疫中心究竟做乜㗎，淨係識攞人工，同新加坡搞旅遊氣泡喎，新加坡人來一次，如果在機場檢測嬲一次，邊度敢再嚟。
朋友T順便問親戚，紐約人點樣看待特朗普？設計師話：「上流社會有錢人、知識分子，尤其是傳媒，好憎特朗普，黑人當然唔鍾意佢，拉丁裔之中，古巴人喜歡佢反共，墨西哥人及南美洲人就討厭佢起邊境圍牆，亞裔呢？好分化，所謂華僑僑領多數親中，來自台灣香港移民對特朗普有啲好感，來自大陸移民睇得微信多，對特朗普當然憎惡，其他亞洲裔就冇乜特殊感覺嘞！紐約白人黑人素來係民主黨擁躉，拜登以大比數贏紐約，一啲都唔奇。根本大部份紐約人，以州長科莫為首經常同總統唔啱㗎啦。」此次選舉，特朗普應該翻盤無望，離開白宮後是否會返回曼赫頓居住？設計師話：「聽講佢會搬去佛羅里達州，費時眼冤，女兒與女婿過去一直係上流社會社交場合常客，但明年返回紐約，可能冇人騷會被社交界冷待，總之輸咗大選，特朗普一家會好難受，威慣惡慣之人，點可以見到人地對佢冷冰冰！」人走茶涼，古今中外都一樣！（按：11月17日報紙已有報導，機場檢疫疑失守，理工大學研究發現嘅！）