近期城中其中一個熱話，肯定係PS5正式發售，唔少拎到機男士都開始諗計點樣瞞住另一半「偷渡」部機返屋企，但其實更多人係撳爛F5都訂唔到機，不過如果你係伊巴謙莫域嘅隊友就唔會有呢個煩惱。事關呢位39歲前鋒近排就提早做聖誕老人，好豪氣咁送全隊AC米蘭隊友每人一部PS5，大派聖誕禮物，真係恨死所有機迷。
近排包括梅沙基奧、森姆卡斯迪利祖，同埋拉菲爾利亞奧等嘅米蘭球員都喺自己ig出post，晒出由隊中大哥伊巴送嘅PS5。過去不時都有球隊大佬過時過節送禮畀其他隊友，好似NBA咁，「大帝」勒邦占士（LeBron James）打騎士嗰陣，就曾經送過隊友每人一個潮爆嘅Beats耳筒。而伊巴今次仲大手筆，包起晒全隊嘅PS5，認真有大哥風範。大哥咁豪爽，做細嘅都一定要有啲表示，好似伊巴嘅前線拍檔拉菲爾利亞奧咁，ig個多謝post直情讚呢位瑞典前鋒係「史上最佳球員（G.O.A.T）」，認真識擦鞋。
一眾只能夠喺網上得個睇字嘅網民，無一唔感嘆伊巴可以咁把炮搵到咁多部機返嚟，同時亦都極為葡萄一眾收到機嘅米蘭球員，網上嘅留言都係充斥住一大陣酸味，「唔怪之得我哋買唔到喇，原來佢哋每個球員都有一部！」、「我哋打開個網搶到好似隻狗咁，撳爛F5掣都搶唔到機，但伊巴竟然可以送晒全隊每人一部。」
當初好多人都唔係太睇好就嚟40歲嘅伊巴再戰意甲，不過事實證明，伊巴嚟咗之後成隊米蘭都升咗呢。由年頭加盟至家吓，米蘭各項賽事都只係輸過三場，新季意甲更加係未嘗一敗排喺榜首。伊巴自己入8球排射手榜第1之外，仲帶起埋隊內一班後生仔，比起過去有唔少嘅進步，已經成為咗隊波嘅精神領袖。但係國際賽期之前米蘭就喺歐霸爆冷主場輸畀法甲嘅里爾，之後亦都只能夠逼和維羅納，聯賽戰火重燃嘅第一場就要大戰拿玻里，唔知成班米蘭球員喺收到PS5之後會唔會士氣大振，打番場好波保住榜首位置呢？
