終於送別國際賽，今周又有番主流聯賽，跟開本欄嘅讀者都知道，我唔太鐘意玩呢類半太公波嘅國際賽，不過都算搵到啲參考價值。好似歐國盃附加賽，蘇格蘭就淘汰咗塞爾維亞出線決賽周，認真可喜可賀，之後再睇埋佢哋作客斯洛伐克嘅歐國聯比賽，雖然輸波，但其實全場壓住主隊，而且瓣數都幾多，唔係以往淨係識高Q大棍嘅踢法，算係進步中嘅國家隊。
一支國家隊興盛，唔多唔少都會帶旺埋呢個國家聯賽，好似西班牙盛世嗰陣，巴塞、皇馬都喺歐洲賽橫掃；蘇超其實都算不斷進步，今周就推介蘇超，撇開格流些路迪兩強，中游球隊反而更好賭，本身實力都高過中下游對手，但名氣唔算響，讓波又唔太多。星期六就有類似情況，第五位嘅登地聯（圖左）主場對榜尾咸美頓，歐洲初盤主W有1.7倍，讓半/一都有高水，雖然戰績上，登地聯唔係好特別，主場只得2勝2和3負，不過輸畀些路迪同喜伯年呢啲強隊，恰如其分啦，對番中下游對手就有把握，加上前鋒沙基蘭有份踢蘇格蘭國家隊，希望佢帶到旺氣畀球會。咸美頓作客四連敗，對格流吞足八蛋，今場輸少當贏。
同時間蘇超二哥些路迪亦都出場，作客第四位喜伯年。些路迪喺聯賽榜俾格流拋離，不過對其他對手仲綽綽有餘，往績仲食住喜伯年，9月首循環主場就數對手3蛋，而且些路迪今季作客成績比主場更好，博佢哋再大勝多一次，「讓球主客和」揀「客勝」。
文：Goal進
截稿前馬會尚未開盤，盤口僅供參考，讀者記得留意足智彩網頁。