達明一派在灣仔伊館舉行六場的「REPLAY LIVE演唱會」演唱會，昨晚最後一場，RubberBand的6號及泥鯭、黃偉文、俞琤、泰迪羅賓及麥浚龍等睇騷。演唱會約8時半開騷，開場時播出獨白版《世紀末顏色》，講完幾句歌詞︰「你見過我，你有冇見過佢，你見到佢。」黃耀明隨即出台講︰「仲可以見到！」為演唱會打開序幕。明哥在整場騷中，不時提醒大家要團結有夢想。
個唱開始不久，明哥開宗明義說會唱兩隻六四前後創作的專輯，希望大家反思歌曲意義，當《天花亂墜》音樂響起全場站立，明哥即說：「跳舞唔使拉！」唱到最尾一句他問觀眾︰「我係咪應該收聲？」全場即齊叫「No！」
繼前晚現場朗讀四川歌迷信後，昨晚明哥又讀出一位廣州歌迷信，內容指2007至2010年間，廣州曾有組織為自己爭取權益、發聲，可惜最終草草收場，當廣州人見到香港市民為自己訴求發聲，身同感受，要為港人打氣，鼓勵要大家「撐下去！」明哥說︰「雖然我所有歌被下架，但（信念）就似瘟疫蔓延。」唱完《愛在瘟疫蔓延時》後，明哥指疫情令大家封閉自己，他呼籲大家多些出來見，否則似歌詞「懼怕中這地夢已失去」，他說：「香港人唔應該失去夢。」
達明唱《皇后大盜》時，背後出現戴住頭盔的手足互相輕撫的畫面，場面令人動容。之後達明唱出《天問》，明哥唱畢後提起這首歌是六四後寫︰「喺電視見到學生紥營、軍隊入城輾過啲學生場面，個人喊到飛起，感觸瞓唔到，成晚玩音樂，就寫咗呢首歌。」
明哥又再叫香港人堅持，達哥則說︰「壞極都好，但唔可以絕望，大家要保留實力。」到唱完《你情我願》後，明哥指當年創作這首歌，是因為當時熱論英國會否給居英權港人，他又說︰「我哋唔係戀殖，而係有獨立思想。」唱完《愛彌留》後，觀眾席有人大叫「香港人」，其他人和應「加油」持續20秒。
演唱會尾段，觀眾以光時口號代替叫encore，亦有人大叫「毌忘義士」、「釋放12」、「香港人加油」等。在觀眾叫喊聲下，達明換衫再上台唱《自由之夏》，屏幕出現「64」字眼，明哥指：「去年係荒謬嘅一年，叫口號有罪、唱歌有罪、寫書有罪、畫畫有罪、點蠟燭有罪同回憶有罪。我見到立場姐姐，令我記得去年六四事件30周年，佢入維園仲有案件喺身未審，相信好多人當日都有去維園，係咪要拉晒所有人？好多國家有限聚令，都畀人上街表達啱嘅訴求，呢個係文明同自由社會應有。」
另外，早前傳離婚的柳俊江則與長髮女伴結伴捧場，當他發現記者時，即時彈開一個位坐，他指對方是朋友，問是否發展新戀情？他斬釘截鐵地否認：「唔係。」
