澳門10月份賭收表現勝預期，主要係9月底國家移民管理局正式宣佈恢復辦理內地居民赴澳門旅遊簽注，踏入11月深秋季節，澳門旅遊業反而升溫，券商普遍睇好澳門旅遊業復蘇。
自澳門1999年回歸以嚟，經濟進入高速增長階段，博彩旅遊業為澳門龍頭產業，儘管澳門因為疫情關係，旅遊業死到直，一眾博企業績受到重創，但所有博企坐擁有龐大賬上現金，咁叠水嘅六大博企，即使食足白果幾個月，甚至幾年都死唔去。澳門疫情早已受控，中國亦係全球最先控制疫情嘅國家之一，喺疫情可防可控下，中國經濟亦會最快復蘇，澳門作為內地對外嘅國際窗口之一，當然亦較快從疫情中恢復過來。
眾多博企之中，新濠國際（200）係古天后其中一隻經常留意嘅濠賭股，隨着新濠天地第三期發展計劃，及新濠影滙第二期擴展工程相繼展開，集團喺澳門嘅物業將進一步升級。環球業務方面，集團全力發展世界頂級酒店及娛樂設施，承諾推動集團為賓客呈獻最佳體驗，並克服短期內嘅種種困難。
新濠國際旗下附屬公司新濠博亞娛樂第三季收入按年減少85%至2.13億美元。經調整物業EBITDA虧損按季收窄約51%，至7700萬美元，10月份EBITDA為正數。
大部份大行普遍調高濠賭股明年收入預測，投資評級亦調升至買入，相信博彩企業已走出谷底，可迎來復蘇，新濠圓底收集後升至15元水平企穩，股價有望重上18元水平， 現價買入， 穿14.3止蝕，升穿16企穩博重上18元。
古天后