疫苗消息此起彼落，新舊經濟股長升與長跌的局面，一下子變成你升我跌、你跌我升，戰友們要重新適應步速。如果真係搞唔掂，建議稍為減輕注碼，降低倉位波幅。另一個方法係向績優股埋手，有強勁數據支持，順逆風皆能破浪，好似昨日在蘋果《是日必炒》推介的敏華控股（1999）便是最佳例子。
冷門但有熱炒基因嘅績優股力勁科技（558），同樣值得關注。根據通告，中期盈利不少於8,000萬元，按年勁升4倍，原因係實實在在的銷售收入增加。集團主要從事設計、製造及銷售熱室及冷室壓鑄機、注塑機、電腦數控加工中心及相關配件，行業應用主要為汽車、家電及電子產品等，前者客戶有近期升到啪啪聲嘅比亞迪（1211）及東風（489），以汽車及家電強勢復蘇的形態，力勁科技呢轉食正條水，最新業績更提到會染指新能源汽車產品，汁都撈埋。
力勁盈喜後連升幾棍，正正反映業績turnaround嘅動力。假設上下半年盈利相同，即全年賺1.6億元，以最新市值約14億元計，市盈率僅得單位數，更有機會恢復派息，難怪在高位整固時，每次回試十天線即見買盤吸納，如能企穩1.3元大關，應是另一轉升浪的起點。
唐牛