西甲賽會禮拜二宣佈咗一項全新嘅節省成本計劃，大幅降低西甲各支球隊嘅薪酬上限，其中西甲整體薪酬最高嘅巴塞隆拿，由上季嘅6.7億歐元（約62億港元）薪酬上限大減57%，減至3.8億歐元；而另一豪門皇家馬德里，雖獲西甲最高4.7億歐元嘅薪酬上限，但亦比上季嘅6.4億歐元下降咗25%。西甲主席泰巴斯警告，巴塞同皇馬都要為呢個疫情之下嘅過渡期做好準備。
泰巴斯話：「巴塞嘅收入減少咗30%，佢哋必須進行調整，嚟緊會係過渡性嘅一年，目前巴塞仲未考慮破產，但佢哋如果今年減少唔到開支，就會影響下年嘅預算。巴塞嘅債務可能比較大，喺疫情之前係完全有能力償還嘅，但武漢肺炎出現後帶走咗佢哋好多嘅收入，所以佢哋嘅薪酬水平必須下降。」
對於巴塞球王美斯，下年夏天有機會免費離開西甲，泰巴斯坦言並唔擔心：「我哋當然希望美斯留喺西甲，但基斯坦奴朗拿度同尼馬離開之後，我哋發現完全冇任何分別，我哋已經做好準備。」
雖然咁講，但泰巴斯就再次批評有機會簽美斯嘅曼城，成日喺規矩以外簽人：「英超唯一要簽美斯嘅球會淨係得曼城，佢哋成日喺規矩以外同其他球會競爭，我唔係唯一咁樣講嘅人。曼城唔受武漢肺炎疫情影響，因為佢哋喺其他規則之上，根本冇辦法同佢哋抗衡。」