立法會無晒民主派，得返一個「忠誠反對派」，唔使再煩點人數，建制派可以風騷快活返工。梁美芬噚日生日，喺立法會又收花又切蛋糕，仲喺facebook貼咗張相，仲寸爆熱血公民鄭松泰（泰博），究竟咩事呢？
之唔係泰博早排生日，居然切美心蛋糕，鼠王芬就特登揀埋同款蛋糕影相，連動作都學埋，兩張相拼埋一齊都幾無違和感，相當sweet。
天蠍男與天蠍女，或者都有種默契。噚日議會繼續辯論紓緩道路交通擠塞嘅無約束議案，泰博話香港交通擠塞問題，實情同城市規劃有關，準確啲講係同特區政府放棄咗城市規劃有關，跟住奇蹟就出現了，緊接發言嘅鼠王芬居然話同意泰博呢個觀點。
有網民相當風趣，話既然佢哋兩個黨臭味相投，係咪可以合作搞政治聯盟「熱血經民聯」。八方見連鼠王芬都抽泰博水，平時笑開「黃絲」不可理喻嘅泰博，唔知又會點諗呢？
李八方