做地產有錢出錢、有力出力、有關係出關係。是的，早年識了個廠佬，疫情下他大陸加工廠摺埋。日前收到他Call，我當堂嚇一跳。
完全零地產經驗的他現在竟然是本港一家上市公司國企XX集團中國發展項目總監，負責中國物業發展，包括項目活化、商舖及住宅物業買賣和租賃，遍及上海、天津等。無事不登三寶殿，搵我是為了砌客和招兵買馬。他聲稱自己年薪100萬元人民幣，想我先介紹有料到的中層管理人員讓他建立團隊，月薪6萬元人民幣，還想我把所認識的人脈聯絡清單給他。佣金？無。都話他地產零經驗。這就是國企高管年薪百萬的質素嗎？
我直話直說問他：「咁大間上市公司會搵冇呢行經驗嘅你去做高層？」他答：「啲老總鍾意我隨傳隨到，玩得猜得劈白酒又得，不過一個星期飲幾晚好辛苦，又要瞞住老婆陪佢哋去玩。」做經紀從來都在賣關係，某程度是消費你的人脈網絡，燒乾燒淨，燒到無單返，咬老底一排，自然會流失。
換着是當年初出茅廬，我一定義不容辭，無非拋磚引玉。但已相識多年，明知我是經紀，想借啲意攞着數，這是不尊重經紀的行為。奉勸所有經紀弟兄們不要做賤自己，如果有人想食免費午餐，記得和他說：「每個經紀都有價，畀唔起錢，唔該過主！」
小師兄