提起結紮手術，相信唔少男人都會避之則吉，如果係老婆大人嘅命令嘅話就更加難搞。車路士後衞堤亞高施華（T施華）嘅太太最近就透露，因為怕自己肥所以打算說服老公接受結紮，堂堂男人搞啲咁嘅嘢，唔知呢位巴西老將今次點拆呢？施華嘅前輩大哨朗拿度就話唔使怕，只要事前做好準備儲定貨，咁就冇問題。
堤亞高施華同太太伊莎貝爾𠵱家已經擁有兩個囝囝，一家四口樂也融融。近日伊莎貝爾喺社交網站回應網友問題嗰陣，就談論到關於避孕嘅問題，伊莎貝爾就透露由於家族病史嘅關係，令佢唔能夠接受絕育手術：「好多人問我點解寧願食避孕藥都唔絕育，因為我家族有好多人接受絕育手術之後都出現肥胖問題，所以我唔希望冒險。」
雖然伊莎貝爾冇打算接受絕育手術，不過佢就打算將呢個責任交畀老公：「我已經同老公同埋我哋嘅醫生傾過關於佢接受結紮嘅事，呢個對我嚟講係最理想嘅做法，但我哋依然討論緊。」伊莎貝爾又透露，其實堤亞高想繼續生小朋友嘅願望，成為咗佢要結紮嘅最大障礙，不過伊莎貝爾就話唔願再生喇：「當老公唔再幻想我會繼續生小朋友嘅話，相信佢就肯接受手術，而我就唔再需要食避孕藥。」
雖然堤亞高施華自己就冇提過關於結紮嘅事，不過佢又唔使太擔心嘅，事關佢都唔係球壇第一個。佢嘅巴西國家隊前輩「大哨」朗拿度已經擁有四個仔女，呢位一代傳奇射手上年接受訪問嗰陣就透露自己早喺掛靴之前已經紮咗，不過大哨就指自己準備咗足夠「存貨」，隨時可以生多幾個：「我已經雪藏咗一啲精子，如果第時我同我嘅另一半想要小朋友嘅話，隨時生一隊足球隊出嚟都冇問題！」
除咗朗拿度之外，巴西球王比利當年同首任太太生咗三個小朋友之後，亦都有接受結紮手術。不過比利之後同第二任太太一齊嗰陣，就透過醫生嘅協助下生咗一對雙胞胎，到佢55歲嗰年仲再做多次老竇㖭，認真犀利！唔知堤亞高如果知道呢兩位前輩嘅「生仔經」之後會唔會安心啲呢？