香港人今年受武肺同國安法雙重打擊，幾乎全年無法上街表達對極權不滿，好多人問一切係咪回復「平常」？事實係世界仍未放棄注視香港，繼日本版《新聞週刊》以專題報道「香港在黑暗中浴火重生」記錄了16名香港人在國安法下抗爭；剛剛獲頒馬格尼茨基人權獎、流亡英國的羅冠聰，獲《經濟學人》雜誌邀請他為特刊撰文，主題將會講述世界對中共預警同應對；阿聰同時又再成為《時代雜誌》年度人物候選人，似乎國際對佢關注冇減少真係好忙。
近日「Nathan Law」呢個名頻頻喺各大外媒出現，羅冠聰日前除咗獲頒馬格尼茨基人權獎，仲獲得末代港督彭定康讚揚勇敢捍衞民主人權。較早前《時代雜誌》公佈咗2020年度人物入圍名單，之前落選嘅羅冠聰再次喺候選名單入面，其他候選者有俄國總統普京、英國首相約翰遜等世界領袖。黃之鋒喺fb出po同羅冠聰拉票，話雖然高票唔代表一定當選，但時代雜誌年度人物始終係國際關注焦點，如果可以有一個代表香港人嘅臉孔成為票王，即使再度落選，都可以喺國際發出一點聲音。
另外，羅冠聰亦會以「The battle goes on（戰鬥仍繼續）」為題喺《經濟學人》年度企劃《The World in 2021》發表文章，講述香港抗爭前路、對中共威權的預警以及國際社會如何應對，文章已經通過核實，預備面世！阿聰仲提到《The World in 》喺超過90個國家發行，繙譯成超過24種語言，單單英語版流通量已達200萬本，佢仲話有幸為港喺國際舞台發聲。
李八方