近排左派吹起批鬥風，直頭寧左勿右，對任何「黃色」、「光復」、「時代」嘅標籤都要批鬥到底。噚日官媒喉舌《文匯》、《大公》就搵咗售賣抗爭相關精品既Yellow Factory做批鬥對象，報道引述民建聯立法會議員葛珮帆批評店舖裝修煽動「港獨」，「康復香港，時代抗疫」係打擦邊球，肆意挑戰國安法底線，不過正所謂唔怕神一樣嘅對手，「葛博士」今次搬起石頭砸隊友，中招嘅係建制立法會隊友謝偉俊。
話說呢單新聞出街後，黃之鋒噚日係fb專頁分享一則「趣聞」，就係見過九龍東選區嘅謝偉俊出過一張寫住「光復積金，錢袋革命。半大訴求，缺水不可」嘅橫額，之鋒反問係咪應該去舉報呢？仲有網友喺留言貼出相片證實真確。根據「葛博士」邏輯，其實佢本人洋名Elizabeth都相當高危、挑戰緊國安法底線，呢個紀念英女王嘅名字甚有外國勢力影子，充滿媚英嘅暗示性；就連「葛博士」所屬嘅「民主建港協進聯盟」都極有可能被取締，又民主又建港，直頭係挑戰國家主權！
李八方