歐洲各大豪門喺2020年飽受武漢肺炎影響下，經濟狀況大受影響，有唔少球會都要減薪同裁員去節省開支。不過最近德國傳媒《圖片報》透露，德甲班霸拜仁慕尼黑就算喺呢段艱難時期，第一樣諗到嘅並唔係點去維持業務，而係優先考慮保證僱員嘅就業問題，仲大爆原來為拜仁打工除咗人工唔錯之外，就連福利都非常好，身為打工仔真係聽到都流晒口水！
作為世上最大球會之一，雖然冇可能每位員工都拎到同球星羅拔利雲度夫斯基差唔多嘅人工，不過拜仁喺疫情期間都對內部超過1,000位嘅員工認真不薄，《圖片報》就大爆家陣拜仁員工嘅平均月薪大約為3,000歐元（約2.7萬港元），就算係球場保安，時薪都有成12歐元。另外德國車廠奧迪作為拜仁嘅贊助商，除咗向高層提供公司用車之外，只要係拜仁嘅全職員工同擁有特別嘅條件，佢哋亦都擁有優惠價向奧迪租車嘅福利。
除咗租車外，安聯球場嘅餐廳都會為員工提供免費膳食，就算疫情期間餐廳暫時關閉，令一眾員工需要轉叫外賣，不過所有費用照由拜仁畀，完全唔需要員工出一分一毫。另外，之前規定話只要拜仁捧盃嘅話，一眾員工都可以獲得獎金，而且球會收入越多，員工嘅獎金都會跟住上升，所以即使係疫情期間，拜仁都冇放棄呢個嘅計劃，上季拎完三冠王後，一眾員工都照樣收到獎金，實在係良心球會！
放眼歐洲，有唔少球會解僱員工外，仲要同隊內球員商討減薪，好似西甲兩大豪門巴塞隆拿同皇家馬德里都要面對呢個情況，巴塞喺4月時已經宣佈一隊球員減薪70%，當時仲搞到球員同高層之間不和，去到今個月巴塞又再要求球員減薪30%，可以睇得出巴塞嘅財政狀況真係比較差，而皇馬都一樣，今個月又再次要班球員減薪；仲有阿仙奴，早前將扮演「清潔龍」長達27年嘅員工Jerry Quy辭退，又係引起風波，俾人鬧冇人情味。
不過拜仁上季單單係一個歐聯冠軍，已經分到超過一億歐元嘅獎金，而且拜仁一線隊入面，冇好似巴塞嘅美斯同祖雲達斯嘅基斯坦奴朗拿度（C朗）咁樣超高薪世界級球星，就算最有名氣嘅羅拔利雲度夫斯基，都同以上兩人有段距離，而其他好似基拿比同哥列斯卡嘅周薪，都唔超過20萬歐元，所以相比其他大球會，拜仁一線隊嘅薪金支出比較低，加上近年贏唔少冠軍，難怪可以畀其他員工嘅福利咁好。