上星期五到陸羽飲茶，茶客滿堂，餐廳R話最近佢旗下嘅食肆生意好轉，心理負擔冇咁重。有報導話，今年聖誕節飲食會旺場，訂座率樂觀喎。
言猶在耳，星期六就聽到消息，11月16日星期一開始，飲食限聚令又恢復番每枱四人，餐廳R來短訊，講到媽媽聲，話目前確診案數字上升，根本沒有證據同食肆六人一枱有直接關係，鬧政府係唔係有心針對飲食業？
餐廳R心情可以理解，大概反映出餐飲業者嘅心情。若說餐廳六人一枱會助長疫情發展，然則本地旅遊，三十人一團，點解政府又放行？今次有行山群組，有冇酒吧餐廳群組？不過今時今日同政府講辦事邏輯，直情係對牛彈琴，記者查車牌，警方可以出動重案組拉人。周街有違例泊車，警察則視若無睹，台灣確診數字，係香港十分一，新加坡確診數字，係香港十倍，政府同邊個搞旅遊氣泡？咪係新加坡囉。
恢復四人一枱，忽然想起校友會會長Y說要搞拜拜NA Can聚會，11月27日星期五晚上在新亞學生食堂舉行。仲搞唔搞呀？以此問會長Y，佢話報名電郵一出，四小時內校友踴躍報名，名額全滿，向隅者眾，尊貴的議員校友要求參加，亦無法招呼，到時會將六人一枱共三十枱改為四十五枱，用膠板分隔，全部食飯盒，以免侍應麻煩及減少參加者走動。左丁山屬新亞農圃道一代，對沙田NA Can一無所知，問1999年畢業嘅會長Y點解要搞拜拜晚會？會長Y話飯堂經理鄧先生對學生好好，每逢學期大考，飯堂就煲好大好大煲湯，學生任飲，為考生寧神定驚，後來傳開咗，非新亞學生亦從崇基聯合逸夫湧到飲湯，因無識認，鄧經理亦來者不拒，當然新亞宿舍學生飲得最多。所有大學飯堂，食物唔慌會好正，現在做咗年青銀行家嘅銀行Y，當年成日話新亞飯堂供應「頹飯」，幾難食。但畢業後，人人都記住鄧經理嗰份溫馨人情。新亞飯堂同一集團管理至今27年，難敵疫情，令整個人來人往之中大校園變成冷冷清清，做生意好難長期只蝕不賺，唯有結業。2000年畢業之醫生N今日已有銀両去W酒店嘆下午茶點心放題，但仍然話要搵時間趕返NA Can飲杯紅豆冰喎！