兩間北倫敦球會阿仙奴同熱刺，周一都收到壞消息，就係隊內各有埃及防中艾利尼同愛爾蘭右閘馬特杜靴迪喺今個國際賽周中咗武漢肺炎。英超官方隨即都確認喺新一輪病毒檢測中，共有16人嘅結果呈陽性，係今季嘅每周確診人數新高。
英超今輪檢測係由今月9號計算到15號，賽會為1,207人進行檢驗，結果有16人呈陽性，當中包括埋利物浦王牌前鋒穆罕默德沙拿，但賽會就冇正式透露確診人士同球會嘅資料，公佈結果純粹係做一個統計。呢個結果創出英超由開季至今嘅每周確診人數新高，諷刺係未踏入國際賽前嘅上一輪檢測，只係得四個人確診，係開季以嚟每周確診統計嘅第二低人數。
一向多口嘅熱刺領隊摩連奴，就乘機喺ig出文諷刺國際賽的禍害：「足球界美妙嘅一周！激情嘅國家隊比賽、精采絕倫同絕對安全嘅友誼賽。賽後先公佈檢測結果，但球隊進行訓練時，就隨便會有唔關事嘅人入場。其實除咗英超，西甲方面都有馬德里體育會嘅烏拉圭神鋒蘇亞雷斯中埋招，最令人失望嘅地方唔係佢冇得代表國家隊周二鬥巴西，而係佢踢唔到周末倒戈無情舊主巴塞隆拿場西甲大戰。