「本人係合約員工，早前上司表示滿意我嘅表現，口頭上已確認會再續約。不過，最近續約一事起暗湧，部門主管見到我枱面冇文件乾淨整齊，覺得我無嘢做，可能有意唔續我約！我自問係個非常自律嘅人，做嘢出名快靚正同整齊，今次第一次咁樣俾人質疑，真係覺得好侮辱！
於我而言，我只係想專心工作，唔想為咗『視覺效果』夾硬堆砌文件放喺枱頭。我心入面嘅想法係，唔續咪唔續囉，遇着呢啲咁膚淺嘅老闆，真係令人心淡。無奈我都要食飯，SON姐認為我應唔應該為現實而低頭呢？」
雖然吹毛求疵，甚至變態的老闆的確有，不過在我看來，你這件事並不是表面上所見咁簡單。當中牽涉的當然是辦公室政治，還有你的做人處事作風性格，都有關。欲加之罪，何患無辭？今時今日，個個用電腦上網做嘢，有幾多文件紙張需要放在枱面？而且你雖然是個合約員工，約滿之後有機會再續約，證明你最少做了一個合約，起碼都有最少半年正常是一年，否則只是合臨時散工。
如果枱面乾淨整齊是你一向的作風的話，大老闆對此有意見的話，為甚麼一直未有出聲？你的上司又一直都不知道他的上司對你有意見？我相信你是一個非常勤奮自律的人，亦覺得自己做嘢快靚正引以為榮，出來社會做事，低頭做事的時候，都要抬頭看一看周遭的人和事。要知道自己的處境位置，才有機會為自己作最好的籌謀和打算。
閒事莫理是對的，做得到看破不說破的更加是高手，但自以為是，活在自己的世界裏，用自己的角度去看事物，用自己把尺做量度準則，就肯定出事。攞起飯碗扒飯，個個都要低頭，值不值得為這一碗飯低頭，不要覺得那麼委屈，是選擇來的！
張慧敏