日本動畫《鬼滅之刃劇場版 無限列車篇》上周四喺香港上映，五日票房衝破1,500萬，氣勢如虹。平日最叻攞彩嘅香港警察喺上畫翌日，立即衝出黎「抄」，借《鬼滅》超強人氣嚟宣傳反應冷淡嘅防電騙活動，而且仲抄得好足，除咗衣着外形相似，連個名「提子治郎」都抄足主角炭治郎，又叫自己做「騙滅之刃」。PoPo或者以為冇人知，點知單嘢放上網後即時傳到日本，除咗畀日本網民鬧、日本傳媒踩，仲連日本內閣官房長官加藤勝信都出埋聲，真係醜出國際。
其實呢張疑似侵權圖幾日前喺差人fb專頁出，當時網民已怒批PoPo抄襲，但警方回覆死口否認，死撐張圖係環繞防騙吉祥物「提子」而構思同繪畫，又話製圖目的係向公眾傳遞防騙訊息，符合公眾利益。不過PoPo死撐唔認冇用，反變火上加油，有網民將PoPo回覆貼去日本討論區，立即引來日本網民大鬧PoPo；日本TBS電視台亦有報道呢件事同警方唔認抄襲，好多日本網民留言鬧爆，有網民寸爆「乜中國會有版權㗎咩？」、「香港警察先係鬼，令人討厭」、「明顯是主角炭治郎吧？佔人氣動畫便宜來宣傳自己，分明是抄襲」。周庭亦在Twitter提到事件，話到《鬼滅》淪為香港警察嘅宣傳工具真係好可悲。
件事越搞越大，結果就連日本內閣官房長官加藤勝信噚日見記者時亦被問到事件，雖然加藤勝信無直接批評PoPo，但表明要保護好日本動漫文化及權利，將採取適當應對措施。「騙徒會以任何形式出現」，相信香港警察今次就係最佳教材，亦令日本人明白咩叫「亞洲最佳」。
李八方