「阿姐，今日嘅籌款活動，希望大家參與，多多支持。」「無錯啊志蟻，希望捐款，多多益善，少少無拘……」
「阿姐，唔講得多多益善，會犯法㗎﹗」「唔係啩，唔係多多益善，唔通叫大家唔好捐咁多啊？」
「阿姐，如果大家捐太多，多過我哋今晚嘅善款目標，就會……犯法，話我哋洗黑錢㗎啦﹗」「唔係啩﹗捐多咗錢就變咗洗黑錢？咁如果遊行人數多過預期，係咪會變咗非法集結㗎？」
「阿姐，你唔係咁天真㗎嘛，咁就梗係㗎啦﹗」「咁點算啊，我哋今晚嘅籌款目標係幾多啊？」
「好似係一千萬喎。」「咁我呼籲大家唔好再捐錢啦，夠啦夠啦，唔好害我哋坐監啊。」
「阿姐，又唔使咁驚嘅，我哋可以改少少咪得囉。」「改乜少少？」
「一千萬……唔係港幣，係美金，哈哈哈﹗大家繼續捐！」「志蟻啊，如果咁，不如改多一樣啦。」
「改乜嘢？」「改咗個主持人囉，如果改咗做我至叻，你老友啊，佢作為藝人典範，佢做主持，捐多捐少，都唔會俾人拉㗎。」
「但咁樣喎，佢啱啱攞完個香港水蓋，嗰個聚會，啲人好多都無戴口罩㗎喎。我哋驚唔驚佢會中招？」「唔怕啦，啲阿sir都無戴，天地有正氣，我諗無事啩。」
「啲人又係嘅，之前就話啲阿sir戴晒口罩，認唔到人，所以就投訴；依家阿sir坦蕩咁俾個樣你睇，又唔鍾意，真係對阿sir好唔公平。」「志蟻啊，洗黑錢仲有一個條例，就係要知道善款來源係咪清白，我哋有無辦法知道啲人捐嘅錢，嚟自邊度㗎？」
「阿姐啊，錢就冇樣睇，但啱啱有人捐咗樣物品，我就建議唔好收。」「點解？」
「驚係賊贓。」「咩嚟㗎？」
「鮑魚。」