圈中有唔少女星都愛投資,有啲鍾意去買磚頭,有啲鍾意買石頭,近年就多咗一班鍾意買手袋,尤其專去買某兩個字母,貪其中一個字母嘅手袋個款長青、升值能力驚人,有錢都未必買得到,仲可以拎去拍賣所拍賣套現,真係唔好睇少當中價值。
「搓嫂」係其中一個出名鍾意買袋嘅女星,佢仲講過買咁多,第時可以留畀未來新抱。其實搓嫂呢鋪癮已有十幾年,由入門10萬元到過百萬元嘅手袋都會買。雖然佢搵到錢已經係圈中小富婆,當然買得起,不過仍要過五關斬六將,由「低」買起先成為到VIP,即係最初要經歷過長長waiting list,要「配貨」買周邊嘅衫褲鞋襪、家具等,先可以擁有呢個牌子第一個手袋,估計佢𠵱家有過百個用嚟收藏。
由於呢個品牌嘅手袋供不應求,搓嫂雖然係大客仔,不過佢就冇擺款,反而行「親民」政策,由舖頭前線到後勤,上上下下都保持良好關係,大時大節好似新年就會派利是,早前中秋節又搵人送咗百幾盒月餅過去,物輕情義重,令班售貨員有貨返記得留貨畀佢。不過有店員就好記性,認得呢款月餅應該贊助,因為有合作過,搓嫂相當識計數兼善用資源。
撰文:Jessie
本欄逢周三刊出
我姐匙縱橫歌影視幕後,多年嚟冷眼旁觀,娛樂圈大小事都走唔過我雙眼,歡迎大家嚟剝花生。