年過70的阿姐汪明荃一向愛時裝，亦非常敢着，年輕時已潮着Thierry Mugler等勁裝，現時也非常玩得，各類撞色、剪裁、風格都隨意挑戰。其中她多年來最愛的服裝品牌，可數比利時的Dries Van Noten，以及玩細褶紋的Issey Miyake，近兩年也迷上Gucci。
秋高氣爽好太陽，儲起不少靚衫、名牌的阿姐，前日就在天台曬手袋，一身Gucci look和愛犬Coco等一齊曬太陽，手袋場面頗為壯觀。阿姐拎了三張麻雀枱放天台，十足擺地攤般，將大批手袋放上去曬，再築起一個晾衣架，將較細的迷你袋串成一串地曬，相當奇趣！目測估計至少有70個，總值過百萬，當中有價值超過10萬的Hermès、七彩鱷魚皮手袋、Dolce & Gabbana珠片手袋、Dries Van Noten龍紋手袋、Burberry經典格紋袋、Bottega Veneta的織皮clutch，以及Louis Vuitton三年前與Jeff Koons聯乘的名畫手袋系列等，大多色彩鮮艷搶眼，有些看來更珍藏多時，相當有年份，看來阿姐對手袋都十分重感情。
其實阿姐上月開始在天台曬衫，她第一次曬圍巾，月初第二次就曬登台衫，各類晚裝、刺繡珠片裙掛滿天台，十足開時裝店。前日曬手袋可說是終極篇，她寫道：「 這個習慣由細個嗰陣已開始、當年住喺北角清華街、一座四層樓嘅舊式樓宇、地下係車房、租出做一間小士多店、仲有頂層一個大天台、我家住三樓，仲有一個騎樓。」
阿姐續謂：「每年放暑假、媽咪都要我同家姐細佬負責將家中各人的冬天衫、棉胎等搬上天台去曬太陽、是一個好大嘅工程、仲要連續曬兩日，確保所有衣物都清潔 、殺菌、冇蛀壞、冇發霉⋯⋯咁做啲衫就可以着耐啲、襟啲。仲記得曬衫嗰陣我會擔凳仔坐定定睇公仔書、武俠小說、因為我要守住/睇住啲衫、驚俾人偷咗呀！童年的快樂時光。」
更多精采時尚內容，盡在http://add.appledaily.com。