大學畢業禮係人生大事，當事人梗係想出席，但唔係人人可以如願。好似前香港眾志秘書長黃之鋒，2014年入讀公開大學，終於今年完成社會科學學士（政治及公共行政）課程，畢業禮12月4號下午舉行，佢話好「希望」能夠以二級一等榮譽畢業生身份出席。
點解係希望？事關佢因為喺警總示威，被警方起訴組織、煽動同參與未經批准集結合共三條罪，下周一（23日）上午再開審。由於案件進入結案判刑階段，佢喺facebook預告，「不排除會遭到即時還柙」，所以係咪可以順利參與大學畢業禮，仍是未知數。雖然佢去年6月都喺荔枝角收押所應考公開大學嘅期末考試，但據佢了解，監獄未有安排在囚人士出席畢業禮嘅先例。
喺前景未明之際，之鋒都呼籲外界關注同為公大學生嘅張俊富，即係仍被扣押喺深圳鹽田看守所嘅12港人之一，特別指出身為公開大學校長嘅黃玉山，都係港區全國人大代表，認為無論係跟進學業、顧及學生狀況抑或執行全國人大代表職務都好，呼籲黃玉山去鹽田看守所探望張俊富。
李八方