80年代港產片黄金時期，最巴閉的美術指導為張叔平、區丁平、奚仲文及朴若木，文念中跟過其中二人，正式紅褲仔出身，通天曉，所以忽然轉身當紀錄片導演，根本冇難度。更何況處女作《好好拍電影》主角是合作多年的許鞍華，阿Ann自動波，任佢舞，電影當然好睇。
所謂「一命二運三風水」，文念中有其二。理工畢業冇耐，出路遇貴人，舒琪介紹入行，跟區丁平當助手。時逢香港電影形勢大好，佢第一部開工為《神經刀與飛天貓》，朱延平導演大製作，重金禮聘區丁平當美術指導，於是文跟師傅做古裝片，大開眼界。其後區丁平改行當導演，作品多由老朋友張叔平任美指，於是文念中轉為由「阿叔」收留。咁嘅際遇，千金難求，命好，運好。
那年代香港製作尚未荷李活化，不似現制度，一套片有美術總監、美術指導、造型指導、服装指導、佈景……，十幾人開工。當年，阿叔只有一個助手，事無大小一腳踢。所謂二人搞掂，即係阿叔命令，文念中執行。在這種師徒制度下成長，雖然日日俾人鬧，24小時開工，但卻練出真功夫。所以文念中乜都得，搭景又識，做衫冇難度。文念中回憶之中，最辛苦是在泰國同期替王家衛的兩部電影工作。那一年王家衛在泰國拍攝《2046》，原劇本講王菲在馬戲團上班，負責訓練大笨象，表演期間遇到木村。製作日子中，如木村冇期，王便改拍《花樣年華》。文念中帶住一班泰仔，人生路不熟，語言不通，要搞佈景服装道具，仲有隻大笨象，真正一頭煙。最最最大鑊的，當然是王導天天在現場改劇本，美術日日執生。馬戲團加王菲加木村加大笨象，文說拍得好好睇，但後來全部剪掉，非常可惜。
文念中滿師之後，獨當一面的成名作為《心動》，攞咗金像獎最佳美術，之後片約源源不絕。其後許鞍華開拍《男人四十》，二人認識並開始合作。第二部一起工作的影片為《黄金時代》，之後《明月幾時有》。拍攝《明月幾時有》期間，文念中忽然興起，想拍一套許鞍華紀錄片，阿Ann又肯制，且自動配合，便催生了《好好拍電影》一片。
行運一條龍，文念中拍許鞍華又有藍本可參考。事緣崔允信1997年曾拍過一部許鞍華紀錄片，名《去日苦多》。《好好拍電影》可以說是《去日苦多》的後續。這紀錄許鞍華心路歷程的二部曲，同樣精采，無分軒輊。
撰文：區紹熙
本欄逢周二刊出
【光影漫步】
超級戲迷，嬉笑怒罵品評新片。漫步影壇細說從頭。著有《港產片真巴閉》一書。
