恒指季檢結果出籠，美團（3690）大熱勝出，股壇李克勤安踏（2020）亦終於奪獎，較令人意外的，是甚少人品題的百威亞太（1876）也成功染藍。
至於被剔出的太古（019），劇本似乎一早已寫定︰近年不停出售香港資產，加上國泰、港龍結業，這家褪色英資，與香港越來越遠了。
另一個焦點在於阿里巴巴（9988），其他新經濟股捱了幾棍陰燭後，收復一半失地屬合理，最強的京東（9618）更是再創新高。反觀阿里巴巴，連最基本收復第一個裂口也未能做到。冇計，四方八面壞消息纏身下，我暫時也與他分手，待一切明朗化再進場都未遲。
iBond將於今日上市，根據輝立暗盤場，最高曾見103.8元，埋單收報103.25元，以獲派最多4手計，也有千多元利潤，夠食番返餐好了。之前好多人都覺得iBond蠅頭小利，不值一顧，事實係政府曲線派錢，梗係食得唔好嘥。當然，亦因為不少市民放棄認購，才造就大家可以中多一兩手。
至於即食定揸到尾，要視乎閣下資金流有幾鬆動，如果屬閒錢嘅話，不妨坐夠三年，2,400蚊利潤袋袋平安，假若突如其來殺出高通脹，回報便會更高。相反，好似我咁當新股抽嘅，見好價便放亦很合理。
唐牛