油麻地廣東道前晚發生唐樓大火，造成七死及多人受傷，咁大單嘢通常必定關民政事務局事，但前晚發生大火時，局長徐英偉竟然喺facebook貼食糖水相，隨即俾網民洗版鬧爆，但最好嘢係佢仲留言死撐，話自己「Multitasking冇衝突」！
話說徐英偉前晚約10點，即廣東道唐樓發生大火期間，喺個人fb發帖分享食糖水相片同埋去買蛋糕畀仔食，包括輔仁媒體總編輯容樂其在內一班網民負評鬧爆，怒斥「朱門酒肉臭，路有凍死骨」，仲質疑徐身為局長「死咗7個人仲有心情去食糖水」。
徐英偉一度喺fb發文以英文留言回應，企圖為政治不敏感開脫，聲稱市民、網民可能仲瞓緊，民政局同事已通宵工作，幫災民應對各種問題，但佢嘅回應未能平息眾怒，網上劣評如潮，並有超過一百名網民派嬲，容樂其再留言質疑，「局長你啱，你食糖水還你食糖水，同事做嘢還同事做嘢，無衝突嘅，係咪~？」徐英偉留言反寸，話當佢同啲同事一齊落手落腳做緊嘢嘅時候，仍然有時間覆容嘅關注， 「Multitasking冇衝突」，結果又引嚟更多嬲同負評。
噚日下午徐英偉再發帖，話對奪命火「深切哀痛 盡力協助」，又向尼泊爾族裔長老表示深切哀痛及高度關注，民政事務總署會盡能力提供一切可行協助，但網民仲係唔收貨，繼續留言寸佢，問佢糖水好唔好食。
李八方