上星期畀兩場英甲全中，唔好畀拍檔富哥威晒；今個周中又係國際賽期，已經踏入尾聲，球星個心返晒去大球會度，準備應付未來聯賽同歐聯大戰，又係搵冷門機會，荷蘭呢幾年俾人感覺都係名大於實，作客波蘭冇咩把握，冷冷地敲個波蘭（圖）W。
香港政府反應慢就係人都知，武肺爆緊第四波仲諗點放寬國內同胞嚟香港；不過都有人墊底，FIFA同UEFA算世界足球最大權力嘅兩大機構，睇住南美、歐洲都爆到七彩，繼續踢國際賽之餘，仲加夠三輪，班球員周遊列國，感染機會亦大增，呢排賽前研究，除咗睇傷兵停賽，仲要睇幾多個球員中招，又要隔離云云。所以家陣班大牌球員都係不先問戰果，但求健健康康完成國際賽後，返球會報到。
講番波先，歐國聯就去到最後一輪，講就講出線生死戰，但有幾多球隊關心晉唔晉到級；A1組意大利榜首，周三贏篤定包尾嘅波斯尼亞就出線，荷蘭作客贏波蘭幾多球都冇用，大條道理放鬆心情去踢。波蘭仲有些微機會出線，當然要大勝荷蘭兼意大利輸波，機會就唔高，不過小國就有啲決心，省靚個招牌，對二線球員去大球會搵食機會都高啲，所以莊家都唔係好睇死波蘭，海外博彩公司參考賠率，波蘭W有3.3倍，都叫做半冷機會，唔錯。
另一場半冷選，係B2組捷克主場對斯洛伐克，敲呢兩支兄弟國和波收場；捷克一定要贏波，兼蘇格蘭失分先有機會，機會就麻麻，斯洛伐克都要搶分護級，上仗對蘇格蘭險勝一球，防守做得唔錯，今仗各得一分合理，敲和波。
文：Goal進
截稿前馬會尚未開盤，盤口僅供參考，讀者記得留意足智彩網頁。