神一樣地回歸，兩場日職全中，再接再厲！
大家以為我再講神戶勝利船，今次唔講日職住，亞冠盃重開，同大家分析先。周中有兩場中澳大戰，分別有上海雙雄：上海上港(上海SP)同上海申花(FC上海)，分別鬥兩支袋鼠兵，睇亞冠盃冠軍初盤賠率，上海兩支強隊就被睇低一線，小組其他對手都係亞冠盃常客，實力都好硬淨，感覺俾人睇死都好正常，但偏偏我就睇中呢點，變相中超球隊有得博吓。
先講星期三F組FC上海對珀斯光輝，因為喺卡塔爾中立場舉行，冇咩高低。光輝喺澳職復賽後好似唔識踢波咁，後防就等於樂富下一個站：黃大仙一樣，有求必應，我都有中過招，所以常規賽跌到第六，季後賽就好快出局，不過都講緊8月嘅事，成班兵休息咗咁耐，11月先話復操，準備去踢亞冠盃，狀態一定唔夠。相反中超因為聯賽啱啱先完，食住個狀態打落水狗，所以FC上海可以睇高一線。初盤讓到平/半，FC上海上盤冇問題。
星期四另一場都係中澳大戰，不過形勢都有啲唔同。上海SP喺中超復賽就難踢好多，場場硬淨，最後季軍戰輸埋畀FC北京，所以班兵都幾疲。對住FC悉尼，呢隊波澳職復賽後，有少少回落，不過好快就攞番節奏，最終拎埋冠軍，平均嚟講真係唔差，所以兩隊其實幾近，但外援質素就上海好啲，有侯克（圖）有阿倫穆爾，但睇怕本地球員對抗，袋鼠仔始終好啲，用波能力都強，去到中東對兩隊都係陌生環境，都係穩穩陣陣要個「細」先，如果估勝負，上海SP讓到半/一，我就覺得多咗啲，加多個下盤，0:0、1:1就收晒。
文：黃耀富
截稿前馬會尚未開盤，盤口僅供參考，讀者記得留意足智彩網頁。