嘉賓A在校友會講中美新形勢，有校友問香港前景怎麼樣，A先生話：「螞蟻千里以外爬嚟香港上市，證明香港有吸引力，雖然上市唔成，但說明咗香港三權之中，都仍然有司法獨立，金融中心仍然係香港。」
講起螞蟻上市，居然可以在上市前緊急叫停，令全世界投資界為之震驚，確實只有中國政府才做得出，中國黨員官員視上市程序如無物，目中無法，確係比香港差好遠，但因為呢隻螞蟻並非螻蟻，而係哥斯拉，A股H股同步上市，集資345億美元，更令人關心以後是否會有同樣事件發生。
馬雲在螞蟻上市前，被一眾藍絲視為中國企業之神，馬雲在視頻講乜，都會瘋傳，上市爛尾之後，內地微信出現大量批評馬雲嘅言論，可謂勢態炎涼，馬雲一時之間說不出話來，也不敢說，否則容乜易變成任志強！中國歷代富商，皆不能得罪在朝權貴，尤其是一國之君，漢朝有鄧通，清朝有胡雪巖，紅頂商人之悲慘收場，可令馬雲警惕。一間阿里巴巴，再加一間螞蟻，總市值加埋超過一萬億美元，在政治體制本質上千年不變之中國，一定要加強掌控，以示誰人當家作主！
一件世界金融史上最大型之IPO，當然籌備經年，事前要打通不少監管關卡，上市要求及極繁複之盡職審查，主要保薦人如中金、摩根史丹利、JP摩根、花旗銀行等都係經驗豐富嘅投資銀行，加埋律師團隊，核數會計師行，佢地準備嘅核證資料（verification notes）隨時超過一千頁紙，中證監睇過滿意先至批准上市掛牌，何其上市前夕，中證監、中保監、中銀監等先至話「螞蟻」有規則未能遵守，簡直係開玩笑！實際上，極可能係政治事件連累馬雲（依家人人話佢大口）。
在整件事情上，香港港交所有如木偶全無主宰能力，上海A股不准上市，香港H股唯有服從。試問如果螞蟻只搞H股IPO，上市前一天中證監又可唔可以通知香港叫停H股？經此一役，中國金融監管之玩泥沙態度暴露於國際投資界，教人知道政治先行，處死之後才提出新規矩（如反壟斷），更凸顯香港法律有規可循，可嘆嘅係現在藍絲就係想拆台，轟走司法獨立！